Tondalus' visioen en St. Patricius' vagevuur (2 delen)

Hijr begint [...] vegevyer dat die heilige patericius van onsen here bat omme dat volc te bekeerne

Men hettene den groten patericius, die de naeste was nae sinte pouwels den apostel, die begheerte den beestliken sinne der lude van yrlant mit predicken twoert gods ende mit schoenen miraculen van den tormenten der hellen te bekerene ende met geloefden der blijtscapen van hiemelrijke hoeren sin te stercken in doegden / Voerwaer seet hi dat beestlike lude sijn / ende oec hebbic ondervonden Want eyns doe ic in dat lantscap was. so quam tot mi also luttel voer paesschen eyn man daer mit eynen grauwen hoefde ende karlachtich van altheyden Die seide / dat hi noyt ons heren lichame ontfaen en hedde Mer hi solde geerne ten naesten paesschen tons heren tafel gaen Ende want hi mi sach monnich ende pape welde hi mi comen te biechten omme dat hi te seker[...]liker solde moghen gaen ten sacramente / ende omme dat ic der talen niet en verstoent so biechticken mit eynen manne die onser beyder tale conste Ende als hi was gebiecht so dedic hem den manne vraghen of hi ye yeman hed ghedoet. Hi antwoerde hi en wist niet selerlic of hijre iet mere dan

[fol. 31b]

vive hedde ghedoet Ende het scheyn dat hi harde onnosel was omme dat so luttel was Mer hi lijde dat hijre voel had ghequets Die hi niet en wiste of si daer af storven of en daden. Hi woende dat doetslach gheyne sonde en waer Ende als ic seide dat eyne herde swaer sonde waer / ende datmen scadelike zeer sijnen scepper daer mede verbolge So seide hi wat dat ic hem te penitencien sette dat solde hi willic ontfaen ende alte gherne voldoen. Dat hebben die lude van dien lande van naturen datse ghereyder sijn dan ander lude / van onbekennicheyden ter quaetheiden; ende also sijn si oec als si hoer mesdaet bekennen ghereyder ende gheduerigher hoere penitencie te doen ¶ Dit heb ic daeromme hijr gheset omme dat ic hoer beestlicheit te bat mochte doen bekennen