Tondalus' visioen en St. Patricius' vagevuur (2 delen)

Vander hei\ligen

[fol. 166a]

die deser zielen toe spraken

DOe die ziele aldus was soe was bi hoer die confessoer ruduanus. ende gruete sij mit groter blijtscappen. Hi ombevinck sij mit ynniger mijnnen ende sechde. Die here behuede dinen inganck. ende dinen uutganc van desen nu tot inder ewicheit. Ic bijn ruduaen dine patrone. Ende doe hi dit gesecht hadde. soe bleef hi staende ende en sechde niet meer Ende dese ziele merkende sach si den heiligen patricius den apostel van hijrlant. mit eenre groter scharen van bisscoppen Onder welken si sach vier bisscopen die sij kende. Patricius heitmen apostel van hijrlant om dat hij dat lant bekeerde also

[fol. 166b]

als hijr voir staet. Dese irste bisscop was Celestinus die eertsche bisscop van archmats Ende malachiam die nae dien man quam in dat eertsche.. bisdoem, die te romen quam inden tijden des pauwes Innocencius. Ende hi wart van hem geordeniert legaet ende eertsche bisscop. Die al dat hi mocht hebben deilde [...] [den heiligen cloesteren ende] den armen Hij was een stichter van vier en vyftich cloesteren. Van monike. canoniken ende nonnen. den hi al hoer noetdorfte voersach Ende hi en behielt by nae niet voer sijn behoef Die ziel sach daer oec kerstiaen den bischop van lijoens. die een lichaemlic brueder was des voersechden malachias Die

[fol. 166c]

een man was van wonderliker suverheit. ende mijnnar der williger armoeden Ende neman den bysscop der stat van clauens eenen sijmpelen sachtmoedigen man Die in wijsheiden ende in sachtmoedicheiden boven die andere ghinc Dese vier bisscopen bekende hi ende beneven hem was enen setel die wonderliken versiert was. daer nyemant in en sat. Doe sechde die ziele Wes is dese zetel. ende waer om is hi dus idel. Malachias antwoerde ende sechde. Hi is enen van onsen bruederen die noch levet inden lichaem. Mer als hi verscheiden is. soe sal hi en be\sitten

[fol. 166d]