Spiegelboeck
(1600)–Jacob Duym–
AuteursrechtvrijBoosen vvil. Celestyne. Onmatighen lust.
Boosen wil coemt alleen uyt.
Boosen wil.
VVat nieus verfrayet hert, 'tsal nu om goet af loopen,
Sy zijn gaen coopen nu, schoon juvveelen met hoopen,
Oft de giericheyt 'thert, vvou bekooren opt lest.
Maer vvaer blijft mijn ghesel, ick hoop in als noch 'tbest,
Hy haelt voor ons een vvijf, die valsch is en doortrocken,
Sy vveet de maechden vvel, aen den dansse te locken,
Een oude coppelers, seer loos, valsch, en doortrapt,
Sy is voor d'ooghen schoon, als een Exter sy clapt,
Maer so dit niet en luct, so valt den moet in d'asschen,
Hier comense vast aen, sy sullent vercken vvasschen,
Celestijnken ick vvensch, u mijn kaer goeden dach.
Celestyne ende Onmatigen lust comen uyt.
Celestyne.
En u oock, en ons vvat, goets datmen eten mach,
My verlangt oft vvy aen, dees bruyt vvat sullen vanghen.
Onmatighen lust.
Ia, ja vvy sullen vvel, gaet ghy altijt u ganghen,
| |
[Folio Cc3v]
| |
Celestijnken de hant, sal u vvorden ghevult.
Celestyne.
Een die zijn beste doet, die en heeft gantsch gheen schult,
Ick hebber meer als dees, 'tnet over 'thooft ghestreken.
Boosen wil.
Ick ghelooft vvel, ghy cont, de vijf vvoordekens spreken,
Gheen cloecker vvijf dan ghy, in dit gheheele lant.
Onmatighen lust.
Meestendeel alsmen haer, met gout vvel salft de hant,
Celestijnken sult ghy, om my oock niet eens peynsen,
Ick soeck oock somtijts vvel, vvat frays naer mijnen sin.
Celestyne.
VVel vvat droes meynt ghy dat, ick een coppelers bin,
Sorcht voor u selven ghy, vvat vvilt ghy my doch leeren.
Onmatighen lust.
Ia sy en doeghet niet, dan al voor groote Heeren,
VVy cleyn moghen ons vvel, daer af houden gherust.
Celestyne.
Siet eens vvie ons hier coemt, o Onmatighen lust,
Ick sou vvat seggen, maer, ghy doet my schoon gelt vvinnen.
Boosen wil.
Een deghelijcke vrou, zijt ghy, dat moet ick kinnen,
Maer laten vvy dat daer, en schaffen vvy vvijsheyt.
Onmatighen lust.
In het svvijghen en doen, doch den meesten prijs leyt,
Celestijnken vvilt u, doch terstont aent vverck maken.
Boosen wil.
VVat hebt ghy met ghebrocht, ick begin seer te haken,
Ist de pijn oock vvel vvaert, laet my doch eens besien.
Celestyne laet een doos sien met juweelen.
Celestyne.
Hier zijn juvveelen schoon, vvaerde ringhen vvel tien,
Peirlen, ghesteenten, en, ketens om met te gorden.
| |
[Folio Cc4r]
| |
Onmatighen lust.
Al vvaer ick noch so vroom, ick moest vvel een hoer vvorden,
Alsmen dat fraey goet siet, vvie sou den lust vveer staen.
Celestyne.
Ghy hout my hier te lang, ghy moest my heeten gaen,
VVant den Coninck die haect, hoe dit spel noch sal enden.
Boosen wil.
Gaet dan heen, doet het best, oft den droes sal u schenden,
So ghy yevvers in brot, ghy crijcht niet een cruys claer.
Celestyne.
Ick hebt al in de hant, men souder niet doen vaer,
Sonder de keirssen daer, die so vvel van voor lichten,
Nu broers vaert vvel ick gae,
Gaet in.
Onmatighen lust.
VVillet kint te recht bichten,
Dit is voorvvaer een vvijf, van hondert sulck niet een.
Boosen wil.
Sy heefter veel ghebracht, in ellendich ghevveen,
Maer dat en raect ons niet, laet ons oock gaen raetslaghen,
Oft dit stuck niet en ginck, naer onses sins behaghen,
VVat vvy dan sullen doen, segt ons den besten raet.
Onmatighen lust.
Neef so ons dit misluct, vvy zijn in armen staet,
En ick ben daer heel uyt, ghy moet ons dan raet soecken.
Boosen wil.
So salt met ghevvelt zijn, ten baet tieren oft vloecken,
Sy moeter vry noch aen, cost oock vvat costen vvilt.
Onmatighen lust.
O Boosen vvil, met svvaert, boghen, spiessen, en schilt,
Gaet ghy liever te vverck, dan met minne oft goetheyt.
Boosen wil.
Ia dat beken ick selfs, liever met cracht dan soetheyt,
So coemtmen daer haest af, anders ist te lanck vverck.
Onmatighen lust.
| |
[Folio Cc4v]
| |
O Boosen vvil ghy zijt, een al te stouten clerck,
Ghy sult u selven noch, in duysent lasten bringhen.
Boosen wil.
Ghy Onmatighen lust, cont u doch niet bedvvinghen,
VVy zijnder voorvvaer tvvee, d'een d'ander seer ghelijk.
Onmatighen lust.
VVy hebben veel ghegaen, t'samen op eenen dijck,
Ons rolle fray ghespeelt, als aerdighe knechten.
Boosen wil.
Ghy soect te vryen meest, en ick soeck meest te vechten,
Als ick tot mijnen vvil, niet vvel en can ghecomen.
Onmatighen lust.
Ghy hebbet meest volbracht, dat ick voor heb ghenomen,
Dus svvijghen vvy vry stil, en laet ons gaen naer huys.
Boosen wil.
VVy moeten onsen baes, helpen draghen zijn cruys,
Met onsen vvijsen raet, zijn verstant heel verdooven,
Voorvvaer hy is vvel vvijs, die ons beyd' vvilt ghelooven.
Gaen in.
|
|