Spiegelboeck
(1600)–Jacob Duym–
Auteursrechtvrij
[Folio V2r]
| |
Den Keyser. De Veltmaerschalck. Den Heraut.
| |
[Folio V2v]
| |
Welphus.
Pact u ghy ras van hier, oft ick maeck u heel stom,
Gheen bootschap hebt ghy hier, dus vvilt terstont vertrecken.
Den Heraut.
Tvergaet u dier, meynt ghy, metten Keyser te ghecken,
Laetse comen by my, die ick gisteren sprack.
Welphus.
Veel vvoorden seg ick u, en vollen gheenen sack,
VVy en hebben voor u, niet dan tghevveir ten besten,
VVy sullen naer ons macht, so bevvaren dees vesten,
Dat hy vreesen mach die, daer sal comen ontrent,
V Heer heeft groot gheluck, vvort hy hier niet gheschent,
Dus neemt ghy ras van hier, naer elders toe u ganghen,
Coemt ghy noch meer vveerom, ick sal u doen op hanghen,
Aen den hoochsten boom die, rontom stadt vvesen,, mach.
Den Heraut.
Onthout ghy vry dat vvoort, en denct op desen,, dach,
Sulcke vvoorden heb ick, vvel haest vveten berouvven,
En diet sprack ginc vvel naer, seer deirlijc zijn hooft crouvven.
VVelphus trect zijn hooft in, ende den Heraut coemt by den Keyser.
De Keyser.
VVat tijding isser nu, de stadt is sy voor ons?
Den Heraut.
So haest als ick daer quam, creech ick antvvoort terstons,
Maer niet naer mijn genoech, het vvas buyten mijn meyning,
Tis uvve Majesteyt, vry een groote vercleyning,
De borghers en mocht ick, niet aen spreken een vvoort,
Welphus selver sprack ick, hy scheen gheheel verstoort,
En hy hiet my vvech gaen, ras op den staenden voet,, oock,
Op hanghen vvou hy my, so ick niet metter spoet,, oock
My en maecte van daer, hy sprack als een quaet boef,
Zijn felle vvoorden quaet, maecten my den moet droef,
VVel leelijck hiet hy my, terstont gaen uyt zijn ooghen,
VVeder te comen en, vvou hy gheensins ghedooghen,
Sulcx is nu d'antvvoort die, mu uvven vyant gaf.
| |
[Folio V3r]
| |
De Keyser.
Ick heb sulcx oock vervvacht, 'tcoemter ghemeynlijck af,
Alsmen met sulck een volck, noch vvilt comen tot sprake,
Maer die keirs is nu uyt, nu niet meer met ghemake,
O Welphe u mach claer, grouvvelen dat ghy leeft,
Tvergaet u dier dat ghy, so luttel om my beeft,
En ick svveer ghy sult sulcx, metten hals haest betalen,
Mijn trouvve Maerschalck vvilt, ghy al het volck aenhalen,
VVy moeten de stadt nu, aentasten met ghevvelt.
De Veltmaerschalck.
Heer Keyser ick sal my, ras op maken int velt,
En alle vveghen om, de stadt vvel vast besluyten,
VVy sullen haer terstont, als voghels inder muyten,
Doen comen ter hant en, singhen anderen sanck.
De Keyser.
Neemt niemant in ghenaed', laetse al gaen den ganck,
Met een leer in haer graf, tis d'oprechte verdinste,
Maer de borghers en doet, doch gheensins niet int minste,
VVant teghen haren danck, comen sy inden last,
Ick gae vvat in mijn tent, beset ghy de stadt vast,
Dat sy ons legher niet, haestich en overvallen.
De Keyser gaet in de tente.
De Veltmaerschalck.
V Majesteyt gaet vry, vvy sullen des stadts vvallen,
So naer alst doenlijck is, om end om gade slaen,
Een van de knechten gaet om de Hopluyden, die terstont uyt comen.
Roept de Hopluyden hier, ick sal haer doen vermaen,
Datse als mannen cloeck, de stadt moghen schoffieren,
Gheluck Hopluyden al, ghy moecht met veel manieren,
Proeven op de stadt te doen vvat is in u macht,
Ghebruyct allen ghevvelt, overvalt haer met cracht,
De Majesteyt heeft haer, u ten besten ghegheven.
Eerste der Hopluyden.
Heer Veltmaerschalck dats goet, onsen Keyser verheven,
Doet vvel, de knechten die, sullen seer zijn verblijt,
VVant sy sullen nu met, vreuchden en grooten vlijt,
| |
[Folio V3v]
| |
Haer tot Majesteyts dienst, cloeckelijck gaen vvenden.
De Veltmaerschalck.
Nu Hopman Strijthaen eerst, sult ghy met al u benden,
Aen d'Oostzijde vvel sterck, besetten de heel stadt,
En ghy Hopman Ruymstraet, sult besetten dat padt
Dat daer int VVesten ligt, en oock al d'ander straten,
En ghy Hopman Cloeckhelt, bevvaert ghy al de gaten
Die daer naer 'tZuyden gaen, hout u in als doch cloeck,
En ghy Hopman VVijknoy, bevvaert den heelen hoeck
Met al den rouvven kant, vant bos staende int Noorden,
Hout doch alle goe vvacht, datse niet door en boorden,
Oft onsen legher slaen, onversiens in de vlucht,
Ick sal u ras bystaen, hoorende crijchs gherucht,
Met al de rest vant volck, dus vveest in als cloeckmoedich.
Tweede Hopman.
VVy zijn tot u bevel, alle ghelijck seer spoedich,
Den vyant heeft gheen cans, aen ons, dus zijt gherust,
VVy en de knechten al, sullen vechten met lust,
Nu ons de stadt so is, eens ghegheven ten besten.
De Veltmaerschalck.
In stadt is buets ghenoech, en vvy sullen ten lesten
Allegader rijck zijn, dus vry den oorboor schaft,
Des vyants boosen moet, vvort van ons haest ghestraft,
By den Keyser gae ick, gaet ghy by de Lantsknechten,
Eendrachtich int ghemoet, doet over al vvel vechten.
Gaen in.
|
|