|
| |
| |
| |
Het besluyt deser teghenvvoordigher Tragedien, van twee Raetsheeren voortghebracht, in Regheldicht ghestelt van twaelf ende derthien Syllaben.
VVat dunct u van dit stuck, Saleucus sloech hy hier mis?
Ick segt dat in sulck lant, seer vvel gaet dats ghevvis,
Daermen de VVetten siet, in grooter eeren houvven,
Maer daerenteghen so, yemant die laet verflouvven,
Oft dat het Recht begint, te gaen creupel oft manck,
So en vvilt niemant daer, zijn in eenich bedvvanck,
Maer met lossen toom loopt, elck in als onghebonden,
In dertelheyt vry voorts, niet achtende de sonden,
Bereet zijnde om elck, groot onghelijck te doen.
Daer Rechtsvoordering slaept, en 'tquaet is int saysoen,
En is te vervvachten niet, dan tvvist, crijch en oploopen,
VVat zijnder doch vervvoest, steden, landen met hoopen,
En dat door ghebreck van, Rechts bediening dats claer.
Yeghelijck moet dees daet, seer prijsen voor en naer,
VVant Saleucus heeft zijn, eer en liefd' gaen betrachten.
Hy en aensach zijn soon, noch der ghemeynten clachten,
Het vaderlijck hert vvas, nochtans in hem onstelt.
De liefde die deed' sulcx, hy leet door haer ghevvelt,
Al scheen hy in als straf, nochtans is liefd' ghebleken.
VVaer hoorde men oyt van, een meerder liefde spreken,
Dat hy uyt steken liet, een ooch al voor zijn kint.
| |
| |
VVaer heeft een vader oyt, zijnen soon so bemint,
Als den desen hier doet, nochtans ist Recht volvoert,, vvel.
O rechts bediening die, der vvijsen hert beroert,, wel,
Mocht ick u doch eens sien, in uvven hoochsten staet.
Och die eens mocht sien u, liefhebbers vroech en laet,
En vvie met raet en daet, u hoochlijck soect t'eeren.
Den troon gaet open, Iusticie sidt op den stoel der heerlijcheyt, met Pax in haren schoot, sy wort gecroont van twee Keysers ende veel Rechtsgheleerde, als Iustinianus, Vlpianus, ende meer ander.
Och vvat is dit? daer is, sy met al haer Heer Heeren,
Gheseten inden stoel, der hemelscher claerheyt.
Nu sie ick vvel vvie daer, af schrijft, dat hy vvaer seyt,
Dat sy Coningin is, inden omloop der aerden.
Hoe heerlijck aensien vvy, dees Princersse van vvaerden,
VVaer mocht ghebeuren ons, meerder vveldaet en vreucht.
Onder de deuchden claer, is sy de meeste deucht,
Sittende met het svveert, aen tvvee sijden snijdende.
Om dat sy Recht sou doen, en niemant zijn mijdende,
Maer naer de VVetten al, vvel straffen elcken een.
Dan heeft sy de vvaech om, t'overvveghen ghemeen,
Alle de saken eer, sy vonnis daer mach strijcken.
Haer ooghen zijn verblint, om dat sy niet sou vvijcken,
Noch ook yemant aensien, maer doen Recht groot en cleyn.
Sy moet de VVetten al, houden suyver en reyn,
VVant het sy arm oft rijck, hy moet voor haer al draven.
| |
| |
Sy en mach oock niet sien, op de giften en gaven,
Maer vvie dattet oock is, bedient sy het Recht bloot.
Pais sit daer heerlijck in, haren lieflijcken schoot,
Bevvaert als daer vvel is, de keirne inde snoester.
Trechts-bediening is claer, van pais een trouvve voester,
En daer sy niet en is, moet den pais vergaen,, doch.
Daer het Recht onvvaert is, mach 'tRijck niet bestaen,, och,
Maer daer 'tRecht in svvang is, sal den pais vvel beclijven.
Siet vvat d'omstaenders al, groote vreucht bedrijven,
Van veel Keysers vvort sy, een Coningin ghecroont.
Hoe vvort sy alom van, veel gheleerde verschoont,
Onuytsprekelijck is, haer groote heerschappye.
Hoe vercondicht doch elck, den lof met herten blye,
Die haer voorvvaer toe coemt, nu en tot aller stont.
Houtse in eeren doch, maect met haer een verbont,
Ghy Oversten des lants, vvilt al voor haer sorch draghen.
En ghy Ghemeynte goet, vvilt, bid ick, al u daghen,
Tgoet Recht ghehoorsaem zijn, tis doch Godes bevel.
Rechts-bediening gaf hy, het svvaert en niemant el,
Dus blijft haer doch ghetrou, met grooter ootmoedicheyt.
So sult ghy leven lanck, in aller voorspoedicheyt,
De Heer sal claer altijt, seghenen al u vverck.
Vliet des overspels sond', hebt op u trou vvel merck,
| |
| |
Het echtbreken laet u, doch eenen grouvvel vvesen.
Denct om dees groote straf, van Saleucus ghepresen,
By de Griecken was sulcx, vvel een oneer en schant.
By de Christenen moest, dit vonnis zijn in 'tlant,
En haer een sulcke straf, stellen naer den betamen.
Dus desen Spieghel neemt, doch in danck al te samen,
De Liefde en 'tgoet Recht, vvort u hier voor ghestelt.
Ghedenct mijnder hier met, al ist datter veel quelt,
Opt Rechts bediening moet, vvel vvorden gheschaft,, fijn,
En de sond' moet eerst hier, oft naermaels ghestraft,, zijn.
Eynde des Spieghels der Rechtvoordering.
|
|
Auteursrechtvrij