Spiegelboeck
(1600)–Jacob Duym–
Auteursrechtvrij
[Folio K3v]
| |
Eerste, Tvveede, ende derde VVachters. Cimona.
| |
[Folio K4r]
| |
Den eersten.
VVas daer niet neghen segt, ickmoet u dat eens vraghen?
Dat ghy cost ghy soudt ons, vvel leyden op het ijs.
Den derden.
Ick seg dat neghen vvas, maect ons gheen brillen vvijs,
Maets saghen vvy niet toe, hy sou ons claer bedrieghen.
Den tweeden.
Ten vvas geen negen neent, waerom moet ghy doch liegen.
Den derden.
Heet ghy ons lieghen dan,
Den tweeden.
Ia ghy liechet recht uyt.
Den derden.
Ghy liechtet selfs segh ick, ghy boef en vuylen guyt,
Sa sa trect stucx van leir, ghy moet teghen my stouten.
Den tweeden.
Coemt al vvilt ghy terstont, ick sal u de huyt blooten,
Meynt ghy dat ick van u, eenichsins ben verveirt.
Sy trecken van leir.
Den eersten.
Hola, hola goe maets, malcander niet en deirt,
Siet toe ginder coemt volck, vvilt u ghevveir op steken.
Cimona coemt uyt.
Cimona.
Ick come gheloopen so, dat ick qualijck can spreken,
So heb ick my ghehaest, om dat ick vvord' vervvacht,
O gheluckich is d'uyr, dat ick desen vont dacht,
VVant eylacen mijn vaer, soud' nu claer al doot vvesen,
Had ick hem metmijn soch, so troulijck niet ghenesen,
Maer het is goet dat sulcx, dit volck niet is bekent,
VVorden sy sulcx ghevvaer, ick vvaer daer door gheschent,
maer ick vragher niet naer, dat mach my niet bekeuren,
Ick en vragher niet naer, al moest icker om treuren,
Totter doot toe vvil ick, mijnen vaer zijn ghetrou,
Dus ick my dervvaerts spoey, al ben ick maer een vrou,
Ick vvil vervvachten al dat, my daerom sal gheschieden,
| |
[Folio K4v]
| |
Cimon.
VVaer blijft mijn dochter doch, vvat mach dit nu bedieden,
Verlaet sy my dan oock, o ongheluckich mensch,
O doot, doot, coemt doch ras, naer u ist dat ick vvensch,
VVant ick sie ick blijf van, al de vverelt verlaten.
Den steenwachter ondertast Cimona.
Den eersten.
Zijt ghetroost oude vaer, hier coemt een t'uvver baten,
Ick merck vvel desen man, sal haest gheven den gheest,
Maer best roep ick voor al, onsten steenvvachter eest,
Dat hy haer ondersoeck, en vry vvel ondertaste.
Cimona coemt weder inden kercker.
Steenwachter.
VVel vrou zijdy daer vveer, ghy coemt als de ghepaste,
Ick sorch dattet int lest, schuylt vvat bedroch oft list,
VVat ick tast ick en vind' niet, mijn meyning heeft ghemist,
Dus coemt hier binnen vry, ick laet uvven lust boeten.
Cimona.
Mijn beminde vaer u, moet ick vriendelijck groeten,
Hoe macht met u al zijn, ist hert oock noch ghesont,
hoe bevint ghy u al, maect my van alles cont,
En openbaer my vry, uvves hertzen secreten.
Cimon.
Dochter ick meynden dat, ghy my al hadt vergheten,
Mits dat ick van u coemst, nu gants niet en vernam.
Cimona.
Dat ick t'huys te doen had, vvas oorsaeck dat ick quam
So laet ten is vry niet, sonder veel groote reden.
Steenwachter.
Hier gasten stucx vvilt ghy, doch vvat achtervvaerts treden,
Ick moet door dit gat sien, vvat datter is te doen,
Desen man en eet niet, hy vast avont en noen,
Niemant en is daer oock, die hem gheeft eenich drincken,
Vvaer af dat hy noch leeft, en can ick niet ghedincken.
Dat hy al lang doot is, vvort ghemeynt vanden Raet,
Sijn leven vvort verlingt, sulck blijct ons metter daet,
| |
[Folio L1r]
| |
Des moet ick hier al stil, op de saken gaen mercken.
Cimona.
Nu beminde vaer coemt, vvilt u hert noch eens stercken,
Ick bring u hier noch eens, een stijve volle borst.
Cimona geeft de vader haer borst.
Cimon.
Och sy coemt vvel te pas, ick heb so grooten dorst,
Ick vvas in onmacht schier, van benoutheyt ghevallen.
De vader suycht.
Cimona.
Vader suycht doch vvel stijf, en spaert doch niet met allen,
Tus t'uvven besten al, nemes doch vvel u meuch.
De steenwachter iet door 'tgat.
Steenwachter.
O ghy doortrocken vvijf, o ghy leelijcke seuch,
Ick dacht vvel dattet noch, int lest eens soude vuylen,
Ten cost anders niet zijn, daer en moest vvel vvat schuylen,
Ia vrou ist hierom dat, ghy hervvaerts naemt den ganck,
Dit voort u vvel verleert, dat vved' ick eer yet lanck,
VVast hierom dat ghy quaemt, uvven vader besoecken.
Cimon.
Och dochter dit is d'uyr, die ick vvel mach vervloecken,
Dit is den meesten noot, voor u een svvaer stuck.
Cimona.
Och neen vader grijpt moet, vvie vveet vvat voor gheluck
Ons noch aenstaende is, vvilt ghy doch vvel gherust,, zijn.
Den steenwachter sluyt haer beyde by een.
Steenvvachter.
Blijft daer binnen by hem, den lust sal haest gheblust,, zijn,
Nu gasten gaet ghy in, en neemt vvel acht op als,
Ick gae met grammen moet, dit seer boos stuck en vals,
Verclaren aen den Raet, ick ken my heel onschuldich,
Ick ben op dat loos vvijf, heel gram en onverduldich,
Dus vvil ick 'tverhael doen, aen den trouvven raet,, snel,
Datmen somtijts quaet acht, namaels vergaet,, vvel.
|
|