Spiegelboeck
(1600)–Jacob Duym–
Auteursrechtvrij
[Folio H1r]
| |
Den Mayer. Miltiades.
De Mayer met twee dienaers coemt uyt.
Den Mayer.
Ick heb hier eenen last, vvel teghen mijnen danck,
Tmoet nochtans volbracht zijn, men doet veel door bedvvanc,
Des moet ick henen gaen, soecken eenen te vanghen,
Och vvaer hy uyter stadt, dat vvaer naer mijn verlanghen,
Miltiades stont ghy, duysent mijlen van hier,
Sulcx vvaer my een vreucht, vvant ick sorch 'tvergaet u dier,
So ick mijn hant op u, nu dadelijck can legghen,
Maer so ickt niet end deed', vvat sou den Raet doch segghen,
Als ick mijnen last niet, naer haer bevel volbrocht,
Ten dient niet uyt ghestelt, hy moet vvorden ghesocht,
Vrymoedich vvil ick dan, hier in zijn huys gaen treden,
Hy heeft de stadt veel dienst, ghedaen, 'tschijnt teghen reden,
Den Raet vveet vvat hy doet, tis haer ernstich bevel,
Die sijnen last volbringt, doet anders niet dan vvel.
De Mayer gaet in, ende comet terstont weder uyt met Miltiades.
Miltiades.
Heer Mayer schuylter yet, vvat heb ick doch bedreven?
De Mayer.
Ghy moet u hier in mijn, handen ghevanghen gheven,
Het belieft den Raet so, tast stoutelijck toe.
Miltiades.
Ghevanghen gheven, vvel, vvaerom, segt my eens hoe?
Heer Mayer vvilt my doch, de reden eens verhalen.
De Mayer.
V schulden zijn seer groot, die ghy noch moet betalen,
Ghy hebt noch onder u, der ghemeynten haer ghelt.
Miltiades.
| |
[Folio H1v]
| |
Legghen sy my dat voor, so ben ick gants ontstelt,
En desen dach mach ick, eylaes seer vvel beclaghen,
VVord' ick ghevanghen nu, in mijn stock oude daghen,
Is dit voor den dienst die, ick de stadt heb betoont,
Heb icker nu dit voor, vvord' ick nu dus beloont,
Sal ick in banden hier, moeten suchten en karmen.
De Mayer.
Den eersamen Raet sal, licht uvver noch ontfarmen,
VVat icker in doen can, sal t'uvven besten,, zijn,
Die ghenade versoect, crijcht haer ten lesten,, fijn.
De Mayer met den gevangen gaen in de gevanghenis.
|
|