|
| |
Vande vijfde Gheschiedenis, de eerste uytcomst.
Goeden Crijgh, T'gheld.
ARm, arm, arm, tsal hier nu gaen ghelden,
VVaer blijft doch nu miin goe vrindin,
De straten ziin droogh, groen de velden,
Arm, arm, arm tsal hier nu gaen ghelden.
Hy tiert, hy baert als den onstelden,
VVat hebt ghy doch in uvven sin?
Arm, arm, arm, tsal hier nu gaen ghelden,
VVaer bliift doch nu miin goe vrindin.
| |
| |
VVel zijt ghy heel steeck blind, siet ghy niet vvaer ick bin,
Ick ben schier los en vrij, de banden zijn ontbonden,
Daer sal gheld ghenoech zijn tis claer nu al ghevonden,
t'Vvord claer nu overal voor u ghemaeckt ghereet.
tHert lacht in mijnen buyck als ick dit hoor en vveet,
laet vrij nu Trommels slaen, laet de Trompetten clincken,
Den Spaingnaert die dit land vvel meynden heel te crincken
En ontsie ick gants niet, noch oock al sijn ghevvelt,
Ick hoop met een schoon heyr, te comen haest int velt,
Te vvater, en te land', sal ick hem vroom besoecken,
Hy plach met voorden stout te tieren en te vloecken,
Siin hert dat heeft ons lang gheheel en al vernielt,
Maer Spaingnen, Spaingnen tvvaer tijd dat ghy eens op hielt,
Ghy hebbet land gherooft, ghebrand, met uvve benden,
Den Adel gants verjaecht, de vrouvven oock doen schenden,
Sy hebbent lang ghenoech gheleden met ghedult,
Den tijd comt nu dat ghy betalen sult u schult,
Ghy vvord bevochten haest in veelderley manieren.
Om my salmen nu noch in u selfs land schoffieren,
Den goeden Crijgh sal hem haest maken op de reys.
Den goeden Crijgh is doch veel beter dan den peys,
Die sy voorvvenden nu en meynen ons bedrieghen,
Mocht gaen naer mijnen sin ick vvilder niet om lieghen,
Ick en vvou haer niet eens meer hooren niet een vvoort.
Neen die keers is al uyt, den Crijgh die moet nu voort,
Hy moeter nu haest aen met houvven en met kerven.
| |
| |
Tis beter cloeck en vroom voor t'Vaderland te sterven,
Dan by den Spaingnaert te zijn een slaef t'aller tijd,
VVy vechten om van sulcx te zijn gheheel bevrijd,
Daer voor vvil ick altijd mijn goed en bloed vergieten,
Die int lest overblijft sal vrijheyt claer ghenieten,
Des vvapent u elck een met herten onvertzaecht.
Ghy Edel, borgher oock, ja al vvat vvapen draecht,
Elck doe doch nu zijn best, denct vvat ons sou ghebeuren,
Ia het kind in de VViech, soud naermaels noch betreuren,
VVeest nu het Land ghetrou, elck doe het Land doch dinst.
Ick sal u al seer vvel aenvueren meest en minst,
Houd u maer slechts gereet, vvilt nieuvvers oock voor duchten,
D'eendracht des Lands vermach veel, daer is niet te suchten,
Den Leeu die heeft nu claer zijn tanden scherp ghevvet.
Naer Spaingnen reyster veel daer vvilter seer veel met,
Tis nu den rechten tijd, om goeden buyt te halen.
Die tzijn verloren heeft, mach hem daer vveer betalen
tSijn brieven van Marck, tis claer al rechtveerdich goet.
O Heeren Staten tLand ick prijs u vroom ghemoet,
Godt laet u blijven doch in dit cloeck stuck volheirdich,
Gaen vvy te samen nu by onsen Prins hoochvveirdich,
Graef Mauritz die daer is ons ghestelt tot Veld-Heer,
Ick vvil hem ten dienst staen, hem sy lof prijs en eer,
Om ons tvvee vvenst hy seer, des laet ons by hem voeghen.
Ick ben den rechten Ploech, om in den Crijch te ploeghen,
| |
| |
VVant daer ick niet en ben daer blijfter veel beschaemt.
Hoe groot een Criichsman is, hoe hooch hy is befaemt,
Als ick daer niet en ben hy moet den hoochmoet svvichten.
Daer ghy niet en sijt en is doch niet uyt te richten,
VVant al is daer tvolck al, men can vrij niet ghedoen
Het gheld dat moet daer zijn, tis voor al int saysoen,
En daer sulcx ghenoech is, ist tvolck vvel haest te vinden.
En die geld genoech heeft, die crijcht voorvvaer vvel vrinden,
Men bringter oock van als vroech en spaed' by de vverck.
Tis tgheld dat daer maeckt moet, die gheld heeft noemt hem sterck
En hy can sijn best doen, den vyand oock verrassen.
Sa, sa, vvy moeten nu gaen op den haspel passen,
VVant tis veel daer tvolck en tgheld tsamen al ghereet is,
En dijser moet ghesmeed sijn tervvijlen dat heet is.
Gaen in.
|
|
Auteursrechtvrij