|
| |
vande vierde Gheschiedenis, de eerste uytcomst.
Goeden Crijgh, T'gheld.
Goeden Crijgh comt voor uijt.
VVAt vind' ick nu al volck, vvat vind ic ooc al menschen,
Die daer met allen seer luyd roepen en vvel vvenschen,
Om my den goeden Crijgh, om my elck roept en tiert,
Het schiint dat sy met my verfrayt sijn en verciert,
Maer luttel peysen sy, vvaer met my onderhouvven,
Och siet vvie ginder comt, de beste vande vrouvven,
Sy is dats claer alleen, die my meest voed en spijst.
| |
| |
VVie hoor ick daer die my soo byster looft en prijst,
Och goeden criigh zijt ghy't, ghy moet vvel gegroet vvesen.
O gheld, gheld, ghy soud my vvel konnen haest ghenesen,
Door u goed onderstand creegh ick miin volle macht,
Als ick u by my heb criight miinen arm sijn cracht,
En door u comt den moed van Ruyters en van Knechten.
Men roepter somtiids gheld alst tijd is om te vechten,
Maer tis dan al te laet, en sulcx is meest misluckt,
En om t'ghelds vvil hebt ghy soo menich mensch verdruckt
Ghemoort, gherooft, gebrand, jae vervvoest ooc veel Dorpen,
ghy hebt om my voorvvaer vvel menich kans ghevvorpen,
Tis om t'ghelts vvil te doen, elck maeckt daer nan ghevvin.
Och, had ick ghelts ghenoegh, dat vvaer vvel miinen sin,
Ick soud' met allen veel en vvonder groot bedrijven.
VVat soud ghy doch al doen?
Ick soud den moed verstijven,
Die nu mids middel cleyn, dick besvvaert is en treurt.
Tis vvel vvaer soo ghy seght, en t'heeft my seer bereurt,
dat ick in kisten vast met banden bleef ghesloten,
Als het Land in nood' vvas, denckt dat my heeft verdroten,
Maer vvat soud ghy doen, als ick vvaer in u ghevveld.
Ey den seer vromen Prins, den seer vermaerden Held
graeff Mauritz die daer is Stadhouder van dees Landen,
| |
| |
Die soo cloeck int veld is, en treckt voor siin vyanden,
die soud ick met meer macht van Crijchs-volc haest bystaen,
vvant daer het gheld ghebreeckt, is d'oorloogh haest gedaen,
En menich vroom Prins moet te vroegh uyt het veld vviicken.
Noch metten middel cleyn, heeft hy soo veel doen blijcken
Siin Prinsliick vroom ghemoed, doend' in als vvel siin best.
Met luttel volcx heeft hy den vyand dick vernest
uyt soo veel Steden sterck, en schier onvvinbaer Schanssen.
Hoe moest den vyand daer van Coevoerden danssen,
Groeninghen vvon' hy oock die over-stercke Stat.
VVat had Geertruyden-bergh van Graeff Mansveld te bat?
Dat hy haer met ghevveld en heyrcracht vvoud ontsetten,
Het belegh des Stads en kond hy gantsch niet beletten,
Graeff Mauritz lagh te vast, hy vvas hem veel te cloeck,
Hy heeft met al sijn macht, bestormt den eenen hoeck,
Oft haer lieff vvas oft leed, sy moestent vvel opgheven.
vvat cloecke daed vvas daer by Tuernout oock bedreven,
Den Graeff van Hohenloo, Solms, Veir, en ander meer,
De Capiteynen al, behaelden prijs en eer,
de Vaendels in den Haegh die sullent vvel bevvijsen.
vvat vvillen vvy doch hier Graeff Mauritz soo veel prijsen,
Siin cloeckheyt is al de heel vvereld door bekind,
Iae sijnen vyand selfs, al vvaer hy siende blind:
Moet vvel siin cloeckheyt groot seer priisen en hoogh loven.
| |
| |
Godt en Heer is met hem, de cracht comt hem van boven,
Hy sal noch vreken claer sijn liefs heers Vaders doot.
O gheld, gheld, had ick u ghenoech daer vvaer gheen noot,
VVy souden haest raet om volck en meer ghevvelts vinden.
Ia die ghelts ghenoech heeft die crijght alom vvel vrinden,
Ick hoop vvel haest te sijn veel meerder van ghetal,
Ick hoop dat my elck sal voortbringhen over al,
Tgheld dat daer heeft soo lang in kisten svvaer gheleghen,
Tgheld dat sy hebben som met onrecht veel vercreghen,
Ia dat lang verspaert is, beschimmelt en vermost,
Tvvort hier noch voorts ghebrocht al ist met cleynen lost,
Ick hoop dat ick u sal haest ghelts ghenoech beschicken.
Och vvaerder gelts genoech, hoe sou mijn hert verquicken,
Ick sou den Spaingnaert ras te vvater en te land,
Al aendoen dat ick mocht, ick hoop dat hy met schand,
Noch het gheheele Landt corts moeten sal verlaten,
Het hangt veel aen tbesluyt der vrome heeren Staten,
Ick goeden Crijgh ben doch tot haren dienst in als.
Ick prijs den goeden Crijgh, met niet te veel gheschals,
Niet tsegghen, maer vvel doen, alst tijd is dan toetasten.
Tis voor ons hoogh tijd dat vvy op den haspel pasten,
En ginghen besien vvat dat tLand heeft in den sin,
Ten vvord claer gheenen peys, gheen dinck ter vverelt min,
Des sult ghy goeden Crijgh daer sijn in grooter vvaerden.
| |
| |
Is daer ghelds ghenoech en vvilt elck my cloeck aenvaerden,
Soo sal ick als een held mijn besten doen met vreucht,
Laet ons dan tsamen gaen, ick hoop vvy doen noch deucht,
Al sietmen nu den Crijgh veel volcx en landen schenden,
Is den Crijgh maer goed, hy sal metter tijd vvel enden.
|
|
Auteursrechtvrij