|
| |
| |
| |
Vande derde Gheschiedenis, de tweede uytcomst.
Eerste, Tvveede, Derde der Borgheren, Eerste, Tvveede der Borgermeesteren.
Twee oft drij Borgers comen uyt.
WEl broers, hoe loopet ons doch nu ter tijd al teghen,
De vyand heeft nu heel de overhand ghecreghen,
Tot Lammen behoud hy de Schants tot sijnen vvil,
Vroegh inden morghenstond, soo meynden vvy al stil,
Met Ponten ses hem vroech met veel volcx aen te tasten,
Maer tis voor ons ghemist, vvant sy op ons comst pasten,
Vier ponten (eylaes) zijn ghebleven in den loop.
het ongheluck dat comt al tseffens over hoop,
Alst blijckt dat den toevoer oock is te rug ghebleven,
Van de goe borghers, die als lief-hebbers verheven
Ons meynden vander gou vvel dertich schuyten graen
Te senden tot ontset, sy quamen lustich aen,
Tot door Copieren Kaegh, daer sy tsnachts den vvegh misten,
Mits dat den leydsman sliep, sy haer alsdoen vergisten,
vvy trocken uyt de stad vvel ghemoed en verblijd,
Om in te halen al de schuyten, maer t'vvas spijt,
vvy hebben nerghens niet een cleyn oft groot vernomen.
vvy en zijn nochtans niet thuys sonder buyt ghecomen,
vvant midden inder nacht ontrent de hoymans brug,
Tvvee schepen creghen vvy, sy mochten niet te rug,
| |
| |
Den vyand hebben vvy seer lustich ouervallen,
Sy deden vvel vvat vveirs, maer ten hielp niet met allen,
vvy vielen haer cloeck aen, vrijmoedich en met lust,
vvy achten niet dat sy vvel vvaren toegherust,
vvy hebben haer vvracht in ons Ponten al gheladen,
En al t'volck over boort, t'vvas al in onghenaden,
Dan eenen Pier, Quaet-raed, ghenaemt, die sal oock voort,
Als eenen boosvvicht stout, en lands-verrader hoort,
Denckt dat sulck een verlies den vyand vvel seer quelden,
Van binnen quamen sy ons int ghemoet als helden,
En vande schepen is deen gheboort in den gront,
En d'ander staken vvy in den brand oock terstont.
Des vvy vervvinners cloeck, daer quamen in met vreughden.
Ick vvasser niet verr' aff, miin hert ter deegh verheughden
Doen ick soo veel goets sagh in de Stad comen daer,
Van broot, van bier, van vleesch, en alderhande vvaer,
Veel koghels, en buscruyt, en noch vvel veerthien bassen.
Quam daer soo vvat veel in, dat soud' ons seer vvel passen,
Een half pont broots des daeghs, dat maeckt ons kaken dun,
Maer soo lang als dat duert, ick anders ons niet gun,
Dan onsen vyand nu cloeck int ghemoet te treden,
Ons Heeren comen hier, ten is niet sonder reden,
Dat sy met sulcken vlijt ons komen nu ontrent.
Twee Borghermeesters comen uijt.
Eerste der borghermeesteren.
hoe borghers, hoe vvel ons lang ghenoech is bekent,
u vroom en trou ghemoed, en u hert seer man-achtich,
vvy bidden u nochtans blijft tot het eynd eendrachtich,
En houd u vroomlick doch, vvant d'eynde vvord ghecroont.
| |
| |
VVy hebbent tot noch toe met een trou hert ghetoont,
En hopent noch te doen, soo lang ons god t'leven geeft.
Tvveede der borghermeesteren.
vvy dancken god die u sulck hert vveert verheven geeft,
Van onsen't half doen vvy oock gheeren in als t'best,
vvy soecken in al tgheen mach dienen op het lest
Voor u, en onse Stad, en voor t'ghemeyn vvelvaren,
vvy hebben voor des stads gouverneur doen verclaren
Den heer van Bronckhorst, die ons in als voorstaen sal,
Hy is ghetrou, en goet, naer t'Princen vermaen,, al,
Sal hy des Stads, en s'Lands behoudenisse soecken.
Tot t'gheen hy ons ontbied, vvy gheiren ons vercloecken,
En tot al tgheen den Raed van ons noch hebben vvil
Eerste der Borghermeesteren.
Ons begeert is in tijd des noods, vveest doch heel stil,
vveest vvel te vreden, vvilt met luttel cost u lijden,
Al doet het ons vvat vvee, denckt vvat een groot verbliiden
Dat hier al om sal ziin, als de Stad vvord ontset,
vvat grooter eer, en priis u cloecke daed bringt met,
Sult ghy noch metter tijd int openbaer bekinnen,
Denckt oock niet dat vvy't door lichtvaerdicheyt beginnen,
Maer met seer rijpen raed, en naer ons slecht verstand
De heeren Staten al van het vereenicht Land,
En miin heer den Prins aen ons tsamen nu ontbieden,
Dat sy niet aensiend' het bederf van soo veel lieden,
Noch de schaed' van't plat land ons inden meesten nood
Vroom sullen bystaen, en bevrijden voor de dood,
Iae hebben liever de Zee-dijcken door te steken,
En sullen liever al de sluysen doen door breken,
| |
[Folio eiijr]
[fol. eiijr]
| |
Dan dees stad proeven soud' des vyands groot bederf.
Och, sulcx t'aenhooren is t'hert vvel een goe conserf,
Nu ziin vvy heel verblijd, den schrick is lang vergheten,
Al souden vvy ter nood noch honden, Katten eten,
En noch maer een des daeghs, den buyck noch niet half vol,
Al is het ghelt al op, al is de schappray hol,
Nochtans soo vvillent vvy voor de stad en t'Land vvaghen,
vvy hebben liever den dood int cort te verdraghen,
Dan slaven naer te ziin, van een seer vvreed Tyran.
Eerste der borghermeesteren.
Och vvy bedancken u, en op dat yederman
Voor sijnen trouvven dienst de stad en t'Land bevvesen,
Soud' vvorden vvel betaelt, en noch vereert mits desen,
Soo hebben vvy ter nood, pampieren gelt ghedruckt,
Al ist maer pampier, soo ons d'onset gheluckt,
Ist al ghebroken gout, en oock seer goet van vvaerden,
Elck een sal't moeten vvel ontfanghen en aenvaerden,
T'vverd haer van't Land en ons goet ghedaen metter tiit:
Niet bliift daer ongheloont, des vvend doch uvven vlijt,
En houd u in als cloeck, in u Tocht ende vvachten,
Den vyand doet afbreuck, soeckt hem by daegh, by nachten,
Als vrome Borghers goet, bliift doch u Stad ghetrou.
O Vroome Heeren vvijs, tis reden dat elck sou.
Nu volghend' sijnen eed, het best doen, vroech en spade,
En u ghehoorsaem ziin in t'gheen ghy vind ten rade,
Ist niet vvaer Broers, al vvaert oock totter dood toe claer.
Sij roepen al jae.
Tvveede der Borgermeesteren.
vvy sullen u voorgaen in allen nood hoe zvvaer,
En hebbent soo goet als ghy in druck en in lijden,
| |
[Folio eiijv]
[fol. eiijv]
| |
Maer den nood vereyscht nu ons beesten te bevrijden,
Die daegh'licx buyten gaen dicht onder Stad int veld,
Den vyand moeten vvy gaen soecken met ghevveld,
Om hem te drijven uyt de cleyn schants van Boshuysen,
Eerste der borghermeesteren.
hy moet doch daer vvel uyt, hy moet haest vander Sluysen,
Daer comt langs d'vvater een galey vvel toegherust,
Daer Gerard vander Laen op is met volck en lust,
Om ter zijd' van den Rhijn de schansse t'overvallen,
Duvenvoord Ioncheer Ian, met de vrijbuyters allen,
Sal trecken uyt het gat, ghenaemt den Delfschen vliet,
En Andries Schot, met volck daer over hy ghebiet
Sal de Rijnsburgher poort cloeckmoedich oock uyt trecken,
Om die van de Poelbrug, uyt haren slaep te vvecken,
Ioncheer Ian vander Does, die is van Noordvvijck heer,
Meeus havicx oock, die beyd' verlanghen al te seer,
Om met haer volck de Schants met Louter cracht te vvinnen.
Tvveede der borghermeesteren.
Eerst lustich sullen sy met vyervverck fray beginnen,
En dan cloeck vallen aen, tot voordeel vander Stad,
Die hem manlickste draeght, die crijghes vrij te bat,
vvant daer sijn opghestelt verscheyden schoone prijsen,
Die inde Schants eerst comt sal de Stad eer bevvijsen,
Met guldens tvvintich vier, vvord hy terstond begaeft,
vvie een spaensch hooft in brengt, die vvord terstond gelaeft
Ses guldens inde hand crijght hy daer sonder falen.
Ey daer moet ick miin best om doen en daer naer talen,
Dat is juyst dat my dient, t'hert lacht in miinen buyck,
Die soo niet is ghesint, vvensch ick de plaegh van Luyck,
Ick vvilder miinen hals, en t'leuen om vvaghen vrij.
| |
| |
Eerste der Borghermeesteren.
Gaen vvy dan vvel ghemoet, en sonder vertzaghen vrij
Maer voor al bidden God dat hy nu byder hand
Eens onse saeck neem aen, en ons doe onderstand,
Die onse toevlucht in nood altijd claer moet vvesen.
Tvveede der borghermeesteren.
Hem sy lof, en danck, die als Vader hoogh ghepresen,
Ons soo ghenadich heeft tot noch toe vvel bevvaert,
Met vasten, bidden oock, al naer den Christen aert,
Moet elck een hem nu gaen met gantscher herten schicken,
En tvviifelt oock niet, hy sal ons ter nood verquicken,
Des moet al dat vvy doen, ziin in des heeren naem,
Een mensch die God vreest, is tot alles vvel bequaem.
|
|
Auteursrechtvrij