|
| |
| |
| |
Vande tvveede Gheschiedenis, de eerste uytcomst.
Baldeso, Eerste, Tvveede der Hoplieden, Eenen bode.
Baldeso met de Hoplieden comen uijt.
HOplieden ghy siet nu den moetvvil vander Stad,
Sy houden haer als voor, noch crijghel en heel prat,
Ick en had sulcx voorvvaer alsoo niet voorgenomen
Ick docht sy ghevent op, als vvy daer slechts voor comen,
Maer tis van my ghemist, sy zijn van and'ren sin,
Het gheeft my vvonder, mits sy gheen volck hebben in,
Sy passen soo't vvel schijnt op Coninck niet met allen,
Crijgh' ick haer, ick vved sy betalen eens de ballen,
Maer door vvat middel doch, ick bid gheeft goeden raet.
Ick soud' de stad terstont beschieten, vroegh en laet,
jae met een groot ghevvelt soud' ick haer overloopen,
Nu sy ziin sonder volck, sy moetent vvel becoopen:
Een die barmhertich is vvord selden hier gheeert.
Dat cost groot volck en ghelt, sulcx Haerlem ons vvel leert,
En de stad Alckmaer oock, t'mach ons seer vvel ghedincken,
Niet gheeren en sie ick de goed' Soldaten crincken,
Daer zijnder claer seer veel ghebleven in den loop,
Ick meyn vvel Leyden noch te crijghen beter coop,
Ick hoop te bringhen haer, soet met list int benouvven.
| |
| |
Ick prijs beloven veel, maer niet oft luttel houvven
Op't hooghsten zvveeren stijff, by dit, en by dat cruys,
En springhen daer met om, als de Cat mette Muys,
Men hoort van sulck volck, niet een onder haer te sparen.
Eerst hebben, maer vvil ick u den sin recht verclaren,
Van't gheen ick nu voor heb, dat oock best dient ghedaen,
Verscheyden brieven heb ick, die haer doen vermaen,
Dat sy als vvel bedacht, haer in ons handen gheven,
Sy ziin van seer goet volck, Lief-hebbers, som gheschreven,
En eenen van my selfs, vol seems en vvoorden schoon,
Ick jon' haer noch ghenaed, jae noch eer, priis,, en loon,
Soo de Stad hooren vvilt, so gaet het naer miin vvenschen,
Doen sy't oock niet, so ziint verdoolde blinde menschen,
Ghy doet haer veel te veel, dat seg' ick hier recht uyt,
En hooren sy nu niet, ick en gheef niet een duyt
Voor haer lijf, en haer goet, sy vvaren vvel straf vvaerdich.
Den Bode comt uijt.
VVaer zijt ghy Bode, comt siet dat ghy u maeckt vaerdich,
Bestelt dees brieven doch met loosheyd in Stad snel,
Seght het Ghemeynt veel goets, dat sy ons te bat vvel
Van ons beloften al, claer moghen vrij ghelooven.
Heer Overst' ick salt doen, maer ick sorgh als de dooven
En sullen sy niet eens aenhooren miin slecht vvoort,
Ick volbring' miinen last in als, soo't vvel behoort,
O Heer u goetheyd sal ick vvel ter deghen priisen.
| |
| |
VVel Bode, doet dat vrij aen u sal ick bevvijsen
Miin jonste groot, gaet dan maeckt u cloeck by de vverck.
Haer macht is doch heel cleyn, en haer stad te onsterck,
Sy moeten voorvvaer vvel, daer is gheen troost voor handen
Sy comen doch gheheel te niet met grooter schanden,
Soo sy des Conincx vvil voor dees reys niet en doen.
Sy en ziin so stout niet, ick acht haer niet so koen,
Sy ziin doch als den visch int net heel vast besloten,
De Stroomen ziin besett, Leydschen-Dam, en Voorschoten,
De Goudsche Sluys, d'incomst oock van't Meyr inde Kaegh,
Ick heb oock met veel volcx besett des Graven-Haegh,
En rond om comen vvy oock elcken dagh vvat naerder.
Nu Heer, ick gae dan heen, nu t'avond alst vvord spader,
So volbring' ick den last, by daegh ist my te heet,
Ick hoop te criighen haest goed' antvvoorde en bescheet,
Ick segh vvee haer, soo sy met onsen Veld-heer gecken.
Gaet in.
Vervvachtend' antvvoord, laet ons van hier vvat vertrecken,
En vvijslijck ons in als beraden op ons stuck,
Dat vvy dees stad soo fray haest creghen, vvaer gheluck,
En sonder verlies van volck, en oock veel schade,, groot,
Doen sy't niet, ick ontseg haer al miin ghenade,, bloot.
Gaen al in.
|
|
Auteursrechtvrij