|
| |
| |
| |
Vande eerste Gheschiedenis, de eerste uytcomst.
Baldeso comt uyt met vier Hoplieden, vvaer aff dat de tvvee eerste spreken.
NAe s'Conincx bevel goet, en des Commandeurs last,
Soo dient nu dese Stad in grooter eyl verrast,
O Leyden, Leyden stout, ghy sult nu moeten proeven
T'geen u aenstaenden is, ghy moeght u vvel bedroeven:
En schaemt u doch dat ghy den Conninck so veracht,
Voor goetheyt groot sult ghy nu proeven eens sijn macht,
Soo ghy u terstont niet vvilt in sijn handen gheven
Het jonck kind inde vviegh' magh schudden en vrij beven:
Soo ghy ons Conincx gnaed' dees reys niet en neemt aen,
Ten sal claer nu niet (alst u vvel lest deed') vergaen,
Graeff Lod'vvijck en sal u nu soo niet meer ontsetten,
Daer is niet inden vvegh, dat ons nu kan beletten
u te schoffieren snel, ghy vvord haest gants te niet.
Dus ghy Hoplieden cloeck vvel vlijtigh voor u siet,
Dat ghy u volck reed hebt om de Stad te omringhen,
En t'vvaer met allen goet, dat vvy terstont aenvinghen
Haer te besetten vast, eert yemand vvord ghevvaer,
Als sy besloten ziin, dan hebbent vvy haest claer
VVant al dat eetbaer is sal haer terstont ontbreken,
Daer comt doch gheen ontset, tot Haerlem ist ghebleken
Sichem, en VVed', ghy sult tot Leyderdorp ziin thuys,
Van Vtrecht comen sy, die op de Goudsche sluys,
| |
| |
En Alphen daer rond om haer voordeel sullen soecken,
Alonso Lopes sal hem eer yet lang vercloecken
Om daer tot Soetervvou, int Dorp en in de Kerck
Hem te beschanssen vast, tot Lammen een seer sterck
ghevveldigh Bolvverck, sal hy op de stroomen legghen,
En Carion is reed (soo vvy't nu claer uyt segghen)
Te comen trouliick aen, van Haerlem onse Stad
Naer Valckenburg, Catvvijck, VVadding', aent Delfsche pad:
vvy sullen den Haegh selfs innemen naer ons haken,
vvy sullent haer vvel so bang en soo benout maken:
de Stad die blijfter claer, des schept al eenen moet,
ghy vvord al tsamen rijck, hier is veel ghelt en goet
Ten besten voor u volck, soo sy hartneckigh blijven,
O leyden, leyden prat, vvy sullent u uytdrijven,
den moetvvil vvord noch van u bitterlijck beclaeght.
u vvoord o Veld-heer cloeck my al te vvel behaeght,
Mits dat ghy sorghe draeght, voor ons en alle Knechten,
Tis reden dat elck vveer lust crijcht om vroom te vechten,
Als vvy van sulcken heer nu vvorden aengheleyt.
De Stad die moeter aen, dats nu int cort gheseyt,
Cray sal gheen voghel zijn, oft ick sal haer haest vvinnen,
Sy sullen s'Conincx macht haest proeven en bekinnen,
Het ghelter nu om goet, het cost haer al den hals.
Daer en is gheen volck, in, en haer ghebreeckt van als,
Sy moet claer haest ons ziin, sulcx en kan ons niet falen,
de Spaengnaerts zijn te veel-de duytschen, ende VValen:
Al tsamen seer cloeck volck, elck van ons isser een.
| |
[Folio biijr]
[fol. biijr]
| |
Is Haerlem niet gheraeckt in jammer en ghevveen,
Daer so veel Crijchslie cloeck en vroom volck vvas te vinden
vvat sal doch Leyden doen, oft haer veel ondervvinden,
Dat sy de poort op doen, en legghen t'hooft in schoot.
Laet haer hartneckigh ziin, ten heeft doch al gheen noot,
Sy moet haest vvel ons ziin, al soud' ick t'leven laten,
Maer ten sal gheen nood doen, vvie comt haer doch te baten,
t'Land is te seer besvvaert haer macht is veel te cleyn.
En die arm is en heeft gheen vrienden int ghemeyn,
Den Moker-heyschen slach heeft haer hoop al benomen,
En ick en tvvijfel niet, so haest vvy daer voor comen,
De sleutels vvorden ons ras int ghemoet ghebrocht.
VVy sullen ons nu dan gaen maken op den tocht,
En snel de Stad int rond' vvel dicht nu besluyten heel
Miin vrome Hoplie t'is niet van nood' te uyten heel
den last die ick nu heb, vvant ghy hem seer vvel vveet,
En ick en tvvijfel niet oft ghy ziit al ghereet,
Naer s'Conincx bevel nu terstont te veld' te trecken.
Heer ghy en derft ons niet tot vechten meer vervvecken,
Noch oock met vvoorden schoon hier maken lanck verhael,
vvy ziin tot uvven dienst doch ghereed al te mael,
Als ghy ons maer last gheeft, doet ghy ons hert verblijden.
Elck een van ons heeft vrij hert en sin om te strijden,
| |
[Folio biijv]
[fol. biijv]
| |
Voor onsen Coninck, oft last-hebben d'Overheyt,
vvant int beginnen niet, maer int eynd' des prijs leyt,
Des vvillen vvy ons al cloeckmoedich int veld toonen.
En tvvijfelt oock niet oft den Coninck salt vvel loonen,
Die rijck en machtich is, en tCrijchs-volck veel goets jont,
Des gaen vvy cloeck int veld ghebruycken ons terstont,
Ter vvijl dat daer hoop is de Stad nu t'ontschaken,, haest,
Ons voorstel sullen sy al tsamen nu smaken,, haest.
Gaen in.
|
|
Auteursrechtvrij