|
| |
Vande vierde Gheschiedenis, de derde uytcomst.
Baltazar Geerards, De Prins van Oraengnien, Sommighe vande vvacht: vvaer onder een Sergeant spreeckt.
Geerards comt alleen uijt.
EY, dit is nu den dagh, tis nu den dagh en tijd,
o Spaengnen, Spaengnen, nu vvord ghy eer lang verbliid
u vreucht die is nae by, de tijding' sult ghy crijghen,
O Paus van Roomen, vvie sal dit voor u versvvijghen,
Met dees hand sal ick nu haest gaen, volbringhen t'vverck,
Ick ken my cloeck ghenoech, ick ken my nu heel sterck,
Sa Oraingnisschen Prins, dit moet u lijf nu ghelden,
Oft miin, oft alle beyd': eertijds ick my onstelden,
Nu vraegh' ick daer niet naer, oft ick nu de dood sterf,
Ick heb om haer ghevvenscht, jae oock seer menichvverf:
Als my d'armoed' te seer quam dvvinghen en benouvven,
O ghy stout Borgoins hert, nu sult ghy niet verflouvven,
Dit moordenaers stout stuck vvord van u nu ghevvracht,
| |
[Folio Giijr]
[fol. Giijr]
| |
Hij toont het roer.
Dit is de reedschap, vvant door dit roer sal met cracht
Hy terstont moeten voort, ick volbrengt sonder schromen,
Hy sal oock, so ick meyn, door dees Sael moeten comen,
Het hert my int lijf danst, het springt my op en neer,
Soo de Zee beroert is van stormen en onvveer:
Soo ziin miin sinnen nu verstoort, t'lijf is in roeren,
Maer vvat helpt sulcx, ick vvil doch het boos vverck uytvoeren
De Prins comt uijt.
Cost oock, vvat cost, al vvaert oock thien mael lijf en siel:
Hier comt hy, het vvaer tijd dat ick hem nu aen viel,
Maer ick moet my noch vvat heel stil en vvijslijck draghen,
Om vvel te treffen hem, ick moet oock eerst gaen vraghen
Naer brieven, die ick met naer Vranckrijck nemen sal.
VVat is de vvereld doch? gheluck oft ongheval,
Heel onghestadich oock, dat nu vvat schiint te vvesen,
Sal morghen gants niet ziin, die van elck vvord ghepresen,
Sal naermaels ghehaed ziin, ghestooten uyt sijn rijck:
Elck een sijn voordeel soeckt, het volck doet al ghelijck
Sijn best seer vvel met vlijt, om hoogh te zijn verheven:
En diet dan heden is, sal morghen vvel niet leven,
Tis vvonder vvaer toe dat deen dander hier vervveckt.
Gaet wat naerder.
Als ick voort gae, dunckt my dat my een te rug treckt,
En vvel soo svvaer als loot ziin alle miin voetstappen,
Ick passer nu niet op, hy sal my niet ontsnappen,
Ick treder nu naer toe, al vvat kan staet nu by:
Een van tvvee blijfter claer, het zy oock ick oft hy,
Ick tvvijfel nochtans niet, oft t'sal al vvel ghelucken,
Hij spreect den Prins aen.
O ghenaedichste Heer, miin tong' die danst op crucken,
O ghenaedichste Heer, ick vvoud' seer vvel naer huys.
Om daer al soet en stil, te leven onder t'cruys:
| |
[Folio Giijv]
[fol. Giijv]
| |
En my met eenich vverck so ick best kan daer gheneeren,
Met dat hij spreeckt geeft hij den scheut.
Des soud' ick eenen brieff van u Ghenaed' begeeren.
Sa, Sa, hy leyter al, ick heb hem vvel ghetreft,
Sa, nu loop ick ras vvegh, dit is al vvel beseft,
Och mocht ick doch nu noch gheraken uyt de Landen.
Ter aerden ligghende.
O God, miin arme siel beveel ick in u handen,
En aen de Staten s'Lands miin kinders groot en cleyn,
O Heer u beveel ick dees Landen int ghemeyn,
Het gheen dat gheschied is, laet ick o Heer u vvreken.
De wacht van de Hellebardiers comt uijt met eenen Bevel-hebber en sommighe Edel-lieden.
Och, och, miin heer die sterft, hy en can niet meer spreken,
Och, och, barmhertich God, dit is een arme saeck:
Och vvaer is den rabaut? dat hem den helschen Draeck
hals en neck breken moet, laet hem al om naer loopen:
Sa, sa, loopt als ras uyt, bedeylt u in vier hoopen:
Laet oock de poorten al vast sluyten van der Stat,
Laet oock vvel gaede slaen, dat daer niet anders vvat
En schuyl, tsy eenich quaet, oft oock verraet van binnen:
Den moordenaer tast aen, maer vanght hem doch met sinnen
Brengt hem niet om den hals, en vvel voordachtich leeft,
En hem dan terstont in der Staten handen gheeft:
vvaer hy in handen doch, mocht sulcx voor ons gheschieden,
Slaet doch nu al hand aen, en meest ghy Edel-lieden:
Och hem doch met ghemack, al stil daer binnen draeght,
hoe vverd doch dese dood van allen man beclaeght,
T'heel Land mach voorvvaer vvel dees dood hier bevveenen,, nu,
Elck een die vroom is, salt van herten oock meenen,, nu.
Sij dragen t'lichaem in.
|
|
Auteursrechtvrij