|
| |
Vande tweede Gheschiedenis, de derde uytcomst.
Veel ghevluchte Brabanders ende onder haer:
Den Coopman, t'Ghemeyn volck.
O Brabant, Brabant schoon, vvat vvaeyt u over thooft,
De Coopman vvord verjaeght, het plat Land vvord berooft,
V neering' ziit ghy quiit, den rijckdom is vertrocken,
Men siet tvvist en tvveedracht, veel vvonders daer berocken,
u goed voorstaenders ziin nu vvijd en breed verstroyt:
Die vvaert eertijden soet, so lieflijck en so machtich,
Ghy ziit nu schier vervvoest, jae heel arm en beroyt,
De straff des Heeren comt nu over u vvarachtich,
En vvee comt over d'Land dat plaghen is deelachtich.
Och d'arme Ghemeynt is nu mistrootich schier gheheel,
Neeringhe die vergaet, armoed' vvord ons ten deel,
| |
[Folio Diijr]
[fol. Diijr]
| |
Eylaes vvy moeten nu ons Vaderland verlaten,
Oft noch so schoon is, vvat macht ons doch nu al baten:
Het hert ontsinckt ons schier, verloren is den moet,
Tis bitter so uyt u o schoon Landou te scheyden,
vvy scheyden uyt het ons, vvy laten ons erfgoet,
Een ander vvoon-plaets moet elck voor sy selfs bereyden,
Daer hy in s'Heeren naem, sijn uytcomst mach verbeyden.
O soet Antvverpen riick, o over schoone stadt,
In u vvas overvloed, en des Lands meesten schat,
Van al de neering' goed, vvaert ghy d'oprechte voester,
Ghy vvaert in Braband als de kerne inde snoester,
Van allen volck vvaert ghy de toevlucht en bystand:
Seer rijck'liick cond' elck een in u den cost ghevvinnen,
vvie tot u quam van breed, of vvijd, bood ghy de hand:
Men sagh u voorvvaer, al des vverelts const beminnen,
Die u oyt sagh, moet sulcx te recht altijt bekinnen.
In sulcken staet was Antwerpen doen de Prins gheschoten was, ende alle de ander steden.
Och vvat salt van u ziin, ghy sult eer lang vergaen,
O schoone Stad, om u ist doch nu al ghedaen,
Te krencken soecken sy u, met list en practijcken,
Och uvven vyand is nu gheplant op u dijcken,
Beleghert is Lillo, Liefkens-hoeck ziit ghy quijt.
vvat voor een droefheyd is daer onder t'volck gheresen,
Ick sorgh Gods vvoord vverd u ghenomen metter tijt,
Och arm bedroefde stad, sy hebben u vervvesen,
Alst den Heer vveer belieft, kan hy u vvel ghenesen.
O Princelijcke stad, ghy Bruessel sult niet lang
Daer teghen houden claer, en Mech'len is oock bang,
Heel Braband achten vvy eer yet lang al verloren,
| |
[Folio Diijv]
[fol. Diijv]
| |
VVaer mochtmen meerder nood voor de Cooplieden sporen
T'loopt hem al teghen siet, t'verloopen is hem naest,
Hy moet een ander plaets voor sijnen handel soecken,
Verslaghen is elck een, elck een is seer verbaest,
Naer Holland, Zeeland oock, gaet elck een hem vercloecken,
Den Coopman vvilt vrij ziin in al des vverelds hoecken.
En vvy ghemeynte slecht, sijn al te seer benout,
Den Coopman volghen vvy, en dat eert ons berout,
vvant sonder Coopman goet, gheraken vvy ter schanden,
Al onsen rijckdom is den arbeyt onser handen,
Arm liedens ziin vvy, als den Coopman ons ontdrijft,
vvant voor hem ist doch al daer vvy om daeg'licx draven:
Hy is die ons goet doet, in rijckdom ons verstijft,
vvy vvercken al voor hem, voor hem ist dat vvy slaven,
God en den Coopman ons in Braband ghenoech gaven.
Nu adieu Braband schoon, adieu Antvverpen groot,
Adieu schoon stad, daer vvy in vvonnen schatten bloot,
van vvaer den handel vvas op allerley quartieren,
Adieu soet liefliick Land, en soete fray Rivieren,
Adieu Speel-huysen schoon, Adieu des vverelts vreugt,
Antvverpen ick sorgh nu den vyand sal u erven,
Die in u qualick-vaert nu daeg'licx is verheugt,
Ick ducht dat ghy eer lang Gods vvoord sult moeten derven,
Adieu schoon Land, daer vvy al meynden in te sterven.
Adieu ons vvelvaert en ghevvin, voor groot en cleyn,
Adieu ons Ouders, Broers en Susters al ghemeyn,
God jon u sijn ghenaed', daer vvy ons op betrouvven,
Maer laster en armoed', sult ghy by u behouvven,
| |
| |
De vyand vvord (sorg' ick) noch uvven meesten gast,
Betrout doch al met ons in onsen Heer der Heeren,
VVy tvvijflen gants niet, oft hy helpt ons uyten last,
Die ons gheleyden sal uyt d'eeuvvich groot verseeren,
Als onsen God belieft, hy kan't ten besten keeren.
Gaen in.
|
|
Auteursrechtvrij