Den Dichtstelder beduydende t'voorgaende.
GHy hebt hier nu ghesien hoe de Maegt vvas in noot
het Crijchsvolc dat gaet nu al vvarent groote Heeren
des lands benoutheit vvas voorvvaer met allen groot
s'Draecx vvreetheyt sagh elck een op alle plaetsen meeren:
de vvreetheyt van Duc Dalf, brocht veel volcx int verseeren
Des vvas de hoop van troost int Land met allen cleyn,
s'Lands vrijheyt saghmen haest in bloed vergieten keeren:
Maer den Nassouschen Held, uyt enckel liefde reyn
Die hy het Land toe droegh, en jonden elck ghemeyn.
Heeft allen raed ghesocht, om de Maeght vrij te maken,
Hy socht hulp daer hy mocht, en als een Prinslijc greyn
En liet niet gheeren de Maeght van den Draec ontschaken:
hy deed terstont al de Lief-hebbers trou ontvvaken,
Den nood hield hy haer voor, hy rust hem metter spoet,
T'gheschiede voorvvaer vvel, naer aller herten haken:
den Oraengnisschen Prins verstreckt oock al sijn goet,
Hy sett' voor 'tLand al by, jae oock sijn Prinsliick bloet,
Des is hy met sijn heyr, seer cloeck te paerd' gheseten,
Hy steunt opt vlieghend' paert, dat is Gods goetheyr soet,
daer hy hem op betrout, dvvelck vvas al sijn vermeten.
Hy toonde dat hy vvas op desen Draeck verbeten,
die hy met ghevveld heeft, als Prins int veld ghesocht,
| |
Des heeft hem Duc Dalf oock die siin comst heeft gevveten
Met al siin volck ghespoeyt, en haest int veld ghebrocht,
de Prins deed' alsdoen dvvaers door de Maes' eenen tocht
En is cloeckmoedich den Draeck int ghesicht ghetreden,
Duck Dalf die toonden hem als die niet geeren vocht,
En baerden daer al om veel list en schalcke zeden,
de tvveede reys' so quam den Held met volck ghereden
Naer Berghen Henegou, maer het verginck niet vvel:
VVant door groot verraet, had hy schier veel smaet geleden
Voor Perseo vvas dit int hert een groot ghequel.
den hooghmoed des Draecx vvies, sijn vvreetheyt vvorde fel
Tot dat hem Perseus by der Zee begheven heeft,
Dat is, tot dat den Prins met cloecken moet seer snel,
In holland, Zeeland oock, veel vvonders bedreven,, heeft,
de vleughels vvorden nat, dvvelck elck toegeschreven,, heeft:
Dat den Prins om het veld te houden vvas te svvack,
Maer deur des Zeekants hulp, hy als Prins verheven,, heeft,
den Draeck bestreden cloeck, vervvonnen met ghemack,
't Land stond hem van als toe, van tgheen dat hem ontbrac
Hy heeft den draeck den Bril van sijn ghesicht benomen,
des hy vvel snellick daer van den Zee-kant vertrack,
En is te Land'vvaerts in met zijn ghespuys ghecomen:
En Perseus den held, bliift Beschermer der vromen,
dus vvord het Land schier in den ouden staet ghestelt:
Elck een begint daer vveer te leven sonder schromen,
d'Afdoen der banden, sal u vvorden haest vertelt,
Naer Spaengnen liep den draec, siin vvreetheyt niet meer ghelt.
|
|
Auteursrechtvrij