Ghedenck-boeck

Den dichtstelder, beduydende t'voorgaende.

HIer hebt ghy nu ghehoort van dees Maeght t'bitter claghen,
het vvelc het Nederland vvas, vol drucx en verdriet
Haer ouders die daer sulcx heel qualick kosten draghen,
Zijn al de Staten s'Lands, die haer hoop vvas te niet,
Door het ghevveld des Draecx, en dat elck haer verliet,
Al haer bedrijf dat vvas, ghekerm, ghevveen, vol suchten.
Maer Perseus den Heldt, haerlieden de hand biet,
Dats den Oraingschen Prins, die int begin moest vluchten
die gantsch niet en ontsagh, al des Crijchs svvaer geruchten:
Hy bood tLand sijnen dienst, en toondent openbaer,
Hy rusten hem tot strijd, met hooghmoet sonder duchten,
Om de Maeght by te staen, in allen nood en vaer:
Des quam hy stoutlijck aen, al vvas den Draeck by haer:
het vvelc vvas den Duc Dalf. seer steur, vvreed en boosdadich
Die heel s'Lands bederf socht, het vvelck bleeck al te claer,
Naer 'tbevel van den Raed van Spaengnen onghenadich,

[fol. Eiijr]

 

Maer den Nassouschen Held, die haecten daer ghestadich,

 

Om 'tLand t'onsetten van den moetvvil en ghevveld,

 

de Vromen haeckten seer, mits bloed dorst onversadich.

 

die den Draeck had, de Prins doet eenen tocht int veld:

 

met Ruyters, Knechten oock, en menich edel Held,

 

Int vlieghen van sijn paert, vvas al sijn goet betrouvven,

 

Dat is, in Godes macht, heeft hy sijn hoop ghestelt,

 

Om te verlossen 'tLand, uyt des Draecks vvreede clouvven

 

En so te stellen vveer in vrijheyt mans en vrouvven.