|
| |
| |
| |
Vande eerste Geschiedenis, deerste uytcomst.
Eenen Trommel-slagher, Eerste, Tvveede, Derde der Crijchslieden.
Den Trommel-slagher de Trommel op beyde zijden van't Taneel, gheslaghen hebbende, Roept:
AL die gheen die den dienst van Iupiter nu soecken,
Die sullen haer terstont by den Hopman vercloecken,
Comt al die vvilt, u vvort seer goet gevveer bestelt,
Elck vindt daer op de handt, besolding goet, en ghelt.
Op beyde zijden gheroepen hebbende, gaet weder in.
Eerste, en Tweede, comen wt qualijc gecleedt.
Eerste der Crijchslieden.
HOu Maet, vvilt ghy niet voort,
De Trommel slaet om knechten.
Iae, ick coem u aen boort.
Hou Maet, vvilt ghy niet voort.
Ick ben noch niet ghestoort,
Wy souden moeten vechten.
| |
| |
Hou Maet, vvilt ghy niet voort,
De trommel slaet om knechten.
VVel ist om quaet te doen, dat can ick vvel aenrechten,
Ick slacht de Spechten siet, die seer veel schade doen.
Gaen vvy dan terstont heen, als fray Crijchslieden koen,
Ick vveet vvy sullen daer gelt en ghevveer ontfanghen.
Die loos is voorvvaer goet, maer ick heb groot verlangen.
VVaer dat gedijen sal, sulcx vvaer my goet verclaert.
Tgelt ghelijck vvaer dat is, ick vind' my onbesvvaert,
Alst slechts een rijck landt is, daer ghenoech is te rooven.
Ick hoop, vvy sullent sien, dan ist goet te ghelooven,
Daer is geen tvvijfel aen, vvy vvorden haest al rijck.
Al vvarent slaghen oock, ick daerom niet en vvijck,
Somtijts soet, somtijts suer, als Crijchslie vvel pleghen.
De Derde coemt uijt.
VVel Maet, hoe ist doch al:
Ghelt op de handt ghecreghen:
Nu ben ick rijck genoech, ick staeck dvverck heel en al,
Ick vved' dat ick my oock haest dervvaerts spoeyen sal,
| |
| |
Maer vvat ghelt geeft hy ons, daer moet vvel op gelet zijn.
Siet Cameraed', het dunct my een spaens pistolet zijn,
En tgaet voor ons al vvel, vvy moghen t'onsen vvil:
Vrij ruijten, rooven oock, een moort is cleyn gheschil,
Daer is gheen quaet so groot, vvy mogent al bedrijven,
De maeghden vvorden eerst vercracht, dan jonge vvijven,
VVy sullen Heeren zyn, t'leyt my so inden sin.
Maer al is t'landt voor ons, hoe raken vvy daer in,
En souden vvy niet vvel, voor't gelt, vvat slaghen crijgen.
Neen, tis quint voor de hant, vvilt doch van svvaerheit svvijgen,
Het landt hoort ons al toe, tis ons ghegheven,, siet,
En daer vvy comen, daer is selden bleven,, iet,
Dus spoeyt u dervvaerts ras, en vvilt al dees sorgh staken.
Goe vriendt, ick en vvil nu niet meer vygh-korven maken,
Ick prijs t'rapier aen zijd', en t'roer fray op den hals.
En ick staeck d'vvercken oock, ick acht heel boos en vals
d'Esels te drijven hier, tsij het castaingnen rapen.
Tis daer af ghenoech nu, laet doch dat Vercken slapen,
De Honden eten haer, diet vvercken zyn ghevvoon.
VVy crijghen noch vvel goet gelt vanden Boer te loon:
VVy sullen hem vrij, noch so heerlick doen opschaffen.
Macht gaen naer onsen sin, vvy sullen hem so straffen,
| |
| |
Al vvat daer niet en is, vvort van hem vvel ghehaelt.
De loos is, Sa Boer, ghelt, oft metten hals betaelt,
En diet niet gheeren gheeft, die dreyghen vvy te hanghen.
VVy sullent hoeden vol, noch metter tijdt ontfanghen:
Fora Viellac o, vvort voor ons een goet vverck,, vvay.
Tot sulcken vverck ben ick een seer gheschict clerck,, fray,
Laet my ghevvorden doch, ick sal haer vvel bestieren.
Ick en sal groot oft cleyn, noch Paep, noch Coster vieren,
En drincken niet dan vvijn, voor daghelickschen dranck.
En niet dan vvittebroot, en teghen haren danck,
Veel goe pasteyen soet, en veel ghebraden hondren.
VVat sullen vvy int Lant noch menich schoon dorp plondren.
Ick vvou daer vvel aen zijn, t'hert verlangt my te seer.
Die nu schijnt eenen Fielt, sal vvorden haest een Heer,
Het gaet hoe dattet vvilt, vvy lyden doch gheen schade.
Ick vveet by my en is ontfermen, noch ghenade,
My en ruckt vviet betaelt,tsy met crom oft met recht.
Daer toe te tasten is, ben ick voorvvaer niet slecht,
Iae met cracht en gevvelt, vveet ickt seer vvel te brouvven.
| |
| |
VVy moeten elck een Hoer en eenen Ionghen houvven,
Hem mach vvel grouvven dan, die ons so crijght in huys.
Daer en pas ick niet op, jae niet een enckel cruys,
Al vvat vvy doen, en is voor ons doch gants geen schande.
Tis al ghenoech ghepreeckt voor lieden van verstande,
Gaen vvy den Hopman by, dat hy ons goe plaets geef.
Gaen vvy, t'vvaer jammer doch dat yemant achter bleef,
Als daer gelt voor ons is, ic dan een seer cloeck Heldt,, ben,
Maer anders ick my een arm Duyvel in het veldt,, ken.
Gaen in.
|
|
Auteursrechtvrij