heysschen der noetdruft ende gelegentheyt deser landen wel sal weten by hem selven te bedencken, voer te dragen ende te bevorderen. Ende indyen het geboerde, dat die vanden raede der voorsz. stadt Dantzich, den voorsz. Bicker objicierden, voorworpen ende voorhielen, diewyle die schippers deser landen zekeren tyt
herwaerts gheen herinck, soudt, wyn ende andere dergelycke noidtrufftige victualien hen nyet toegevuert en hebben, gelyck wel eertyts geschiet is, dat sy oick daertegen het vuytvueren der graenen nyet en sollen konnen gestaden. Daerop sal de voersz. Bicker hen gevueghlick te kennen geven, dat sullek gebreck ende dat alle ende yegelyke waeren ende koopmanschappen, doer de Sonde nyet sekerlyck en moegen passeren ende gevuert wordden, nyet by ons off desen landen onser regieringhe ende staet, maer dat 't zelve toe kompt byden Coninck van Denemarcken, nyettegenstaende allen vliet van onsentwegen by hem gedaen, ende onaengesien de erffverdragen disponerende ter contrarie, ghelyck oick syn Co. M. ons onlancx toegeschreven heeft, dat hy gheene victualien, crychsmunitie noch ander suspecte off verdachtelicke waeren gemeynt was doer die Sonde te laeten vueren, maer daer men deselve betreden ende bekommen konde, te doen aenhalden ende arresteren, waer doer wy gedrongen waeren geweest de steden ende oerden alhier, daer sullicx behoerde, 't zelve te verstendigen, neet dat wy des Conincx van Denemarcken onbevueght voernemen redelyck, oft voer goedt hielen, maer tot dyen eynde alleenlyck, dat die ondersaeten deser landen des een weten hebben, ende hen voer schade ende verlies wachten ende verhueden mochten, soe dat die van Dantzich, aensiende dese gelegentheyt, niet en kommen met redene yet anders suspiceren oft verdencken ende veel weyniger eenige redelicke oerzaecke desenthalven hebben off nemen (gelyck wy oick verhoopen sy nyet en sullen doen) hen van dese landen met oude gewoontlycker guede nabuerschap ende hanteringe te scheyden.
Soe verre oick die voorgenoempde van Dantzich boven 't ghene voerseyt is voerder voerbrochten, hoe dat hoere medeburgers ende handelsluyden met de graenen, die sy hierbevoeren in desen landen gebrocht hadden, nyet en hadden moegen handelen ende deselve vuytvueren nae hoere geliefte, aengesien de mandaeten, dyen aengaende gepubliceert, daerop sal de voirsz. Bicker verclaeren, hoe dat die meyninge overal nyet en is by sullicke mandaeten hen, hoeren meburgeren oft yemanden anders eenigen schaeden oft nadeel toetevueren, maer dat sullicke ordinancien principalyck daeromme geschien, om imminenten, hungersnoot ende perickel daerby te verhueden, ghelyck sullicx oick by anderen naebuerfursten ende stenden wel gebruycklyck is, derhalven die van Dantzich hen billick weyniger hebben te bezweren onser mandaeten.
Als nu de voorsz. Bicker vanden raede van Dantzich, op 't ghene voorsz. is, een behaechlycke antwoerde sal hebben, (gelyck wy ons vertroesten, dat hy wel sal gecrygen), soe sal hy hem voorts by des voorsz. Conincx van Polen stadthouder ende bevelhebberen, aldaer te Dantzich verordent, vervuegen ende nae aensegginge onser gunstige gruetenisse ende geneighden willens hen behanden onsen brief, hem oick medegegeven ende met allen moegelycken vliet aen hen gelyckerwyse versoecken, dat sy die oude gewoontlicke navigatie ende hanteringe, de wellicke des voorsz. Conincx van Polen ende deser landen ondersaeten ende handelsluyden van olts herwaert allewege te saemen gebruyckt hebben, van harentwegen onderhouden ende insunderheyt die bevorderinge doen ende gestaden willen, dat onse ondersaeten in den orden aldaer, hen ende weder, coren ende anders innekoopen, laeden ende herwaerts overschepen ende brengen moegen. Ende hen in alle 't ghene voorsz. is, tegens desen landen soe naebuerlick ende guedtwillich bewysen ende verthoonen willen, als die noedtruft vande ondersaeten ten beyden zyden, ervordert ende vuytheyscht, ende ghelyck wy tot hen des een sunderlick genedich ende guedt vertrouwen draegen, met verclaeringe,
Auteursrechtvrij