XVIII. Afkondiging, gedaan te Utrecht, aangaande die met Luterye etc. besmet zijn. (1545).
Des Dingsdachs op S. Jans avondt.
Myn heeren die stadthouder etc. Alsoe sy verstaen ende bevynden, dat veel vreemds ende lichts volks hem vynden ende metter woen begeven bynen deser stadt ende stadt vryheyt van Utrecht, diewelcke besmet souden syn met Luterye, Herdoperye ende meer andere quade ketteryen, contrarie den heilighen christen gelove, omme die simpele luyden met quade persuasien ende leering tot hen te trecken ende te verleyden, die hem oick onder het scyn van doechden, met behende dieveryen ende kerken te beroven genéren; omme daer dan inne te versien, soe veel moghelicken es, soe gebieden mede myne heeren voorsz. enen yeghelycken, wye het sy, die bynen den tyde van twee jaren herwaerts verleden metter woen bynen deser stadt etc. gecoemen syn ende huysinghe gehuert hebben ofte met anderen inwoenende ofte te cost gaende syn, ende begeven hebben ofte noch voerts alhier metter woen comen, husen hueren ofte met anderen incomen ende te cost gaen willen, dat dieselve gehouden sullen syn, te comen bynen een maent op deser stadthuys, voor schout, burgermeesters etc. ende hoir namen aldaer op scrift overleveren mit goeder specificatie, van waer sy syn off waer sy lest gewoent ende verkeert hebben, ende sellen mede daervan betonen mit goede certificatie, vande plaetse besegelt, daer sy lest gewoent hebben, ende wat ambochte, neringe ofte hantieringe zy bedreven sellen hebben, ende waert, dat yemant bevonden worde nae d'expiratie vande maent voersz. hierinne onwillich ende versumich geweest te hebben, soe sel men 't selve aenden onwillighen ende versumighen swaerlicken corrigeren ende straffen aen horen liven, nae geleghenheyt der saken.
Voerts soe laten myn heeren voorsz. weten ende gebieden, dat voortaen niemant syn huysinge, cameren ofte woensteden yemant vreemdts, van buten op nyeuws incomende, sel moeghen verhueren ofte hem in coste ontfangen, ten sy dat sy ierst consent ende beveel daertoe hebben vanden schout etc, by sware correctie als voren.
(Uit het Utr. Buurspraakboek.)
Auteursrechtvrij