Archief voor kerkelijke en wereldsche geschiedenissen, inzonderheid van Utrecht. Deel 5

XVII. Bevel om de inquisiteurs etc. in hun officie te assisteren. (1545).

Charles, par la divine clemence Empereur des Romains etc., a nos ames et feaulx les chiefs presidens etc., saluyt et dilection.

Combien que pour extirper les mauldictes sectes, heresyes et erreurs cy devant semees en la chrestiennete et depuis augmentees en diverses regions et provinces, et mesmement en nos pays de pardeca, eussions faict et decerne plusieurs placcars, statuts, ordonnances et edicts et appose tres griefves paines contre les transgresseurs d'iceulx; toutesfois nous sommes deuement et au vrai informes, que lesdictes sectes, heresyes et erreurs, pullulent de plus en plus secretement, et de sorte, que sans diligente inquisition et chastoy exemplaire des infectes, est apparant, que l'inconvenient en sera plus grand, que l'on a veu du passé. A laquelle cause veullans et desirans en ce faire nostre debvoir et office envers Dieu, nostre createur, a l'exaltation de nostre saincte foy chrestienne et a l'observance et entretenement des commendemens, ordonnances et constitutions de nostre mere saincte eglise, avons conclu et determine de faire commectre en chacun pays provincial de pardeça, aulcuns bons personaiges docts, sinceres catholicques et droitturiers, pour y faire ladicte inquisition et avoir soigneulx regard a l'extirpation desdicts sects, erreurs et heresyes, faire apprehender tous ceulx et celles, qui par informations ils trouveront culpables, charges ou suspects desd. heresies, sectes et erreurs, pour estre procedes a leur condempnation ou absolution, suyvant l'ordonnance et instrucion, quavons sur ce fait dresse et a eulx delivre; Parquoy vous mandons, commandons expressement, en....... et a chacun de vous en son regardt, que toutes et quantfois que de par lesd. inquisiteurs et commissaires ou lung d'eulx requiz en serez, ayez a faire apprehender et garder es prisons des vos jurisdictions et offices, tous ceulx et celles, quils vous denunceront, soyent gens d'eglise ou autres, et en ce leur faire bailler et donner toute ayde, addresse et assistence, sans delay ou difficulte quelconque, et sans souffrir ou permectre, que en l'execution de leurd. charge, leur soit fait aulcun obstacle ou injure, ne

[p. 312]

a leurs serviteurs, famille ou assistens, ains que lesd. deffendez a vostre pouvoir et faites apprehender les culpables a paine celuy ou ceulx, qui en seroient refusans ou negligens d'estre punis comme faulteurs de heretiques, pour apres estre procede a la condemnation ou absolution desd. prisonniers sommierement et de plain, sans figure des proces, suyvant nosd. placcarts, statuts, ordonnances et edicts et l'instruction donnée auxd. inquisiteurs, et en ce vous acquittez de sorte, que cette affaire d'inquisition tant important, ne soyt empeche ny retarde, mais soigneusement et diligament avancye et execute, selon quils trouvent au bien de la chrestiennete, salut, repos et tranquillite de nos pays et subjects, et de sorte, que de vostre bon debvoir en ceste partye ayons cause de contentement; d'ainsi le faire et ce qui en depend, vous donnons plain pouvoir, autorité et mandamment especial par cesd. presentes, mandons & commandons a tous, que a vous le faisons, ils obeyssent et entendent diligamment; car ainsi nous plaist il, et le voulons estre faict.

Donné en nostre ville de Maestricht, le dernier jour de Fevrier, l'an de grace, mil cencq cens quarante cincq, de nostre empire le xxvii, et de nos reynes de Castiles et autres le xxx.

Soubs escript: Par l'Empereur.

Plus bas: Verreycken.

(Uit het tweede Memoriaal van den Hove v. Utrecht, fol. 354 v.)