XIV. Copie d'une pension, accordée au comte d'Oldenbourg. (1537).
Kaerle, byder gracie Godts roomsche Keyser, altyt vermeerder 's rycx etc., onsen lieven ende getrouwen, die hoofden, tresorier generael ende gecommitteerden van onsen demeynen ende finantien, saluyt ende dilectie.
Doen te wetene, dat in erkentenissene vande goede ende getrouwe diensten, die die welgeboren, onse lieve bysondere, Christoffel, grave van Oldenborch, Delmenhorst etc., ons gedaen ende bewesen heeft, ende hoopen in toecomende tyden noch doen sal; wy om dese ende andere redenen, ons daertoe porrende, hebben denzelven grave Christoffel, by advys ende deliberatie van onze seer lieve fruntlycke zuster, vrouwe Marie, coninginne douagiere van Hongarie, van Bohemen, etc., voor ons regente ende gouvernante in onsen landen van herwaertsover, gegunt ende geaccordeert, gunnen ende accorderen, wt sunderlinge gracien by desen, eine jaerlicxe pensioen van vyfthien hondert ponden van xl groten onser Vlaemscher munten 't pondt, daeraff wy willen, dat hy elcx jaers betaelt sal worden by handen van onsen lieven ende getrouwen raedt ende ontfangher generael van onser financien, Heynrick Starcke, ofte andere onse ontfanghers toecomende, telcke xv daghe der maent Junio, daeraff den xv. dach der maent Junii in 't jaer 38 naestcomende d'eerste jaer verschenen sall wesen; ende soe voort van jare te jare, zyn leven lanck gedurende, of ter tyt toe, dat hy versien sal wesen van beneficien, jaerlicx weerdich wesende die voorgaende somme van 1500 pont; ontbiedende u daeromme ende bevelen, dat doende den voorsz. grave van Oldenborch genieten van dese onse gracie ende gifte, ghy hem doet jaerlicx uytreycken ende betalen by onsen voirsz. ontfangher generael, teghenwoordich of toecomende, die voorsz. somme van 1500 pont sjaers, te beginnen ende durende, soo voorsz. is, denwelcken onsen ontfangher generael jegenwoordich ofte andere toecomende, wy oic bevelen, dat alsoe te doene ende overbrengende mits desen vidimus ofte copie authentycq vandien, voor eens ende de eerste reyse, ende soo meenich wanneer als 't van noode wesen sal, quittantie vanden voorsz. grave van Oldenborch, daerop
dienende, alleenlyk; wy willen al 't ghunt, des hem ter cause vandien betaelt sal wesen, geleden ende gepasseert te zyne inde rekeninge ende afghecort vanden ontfanck van onsen voorsz. ontfangher generael vander financien, teghenwoordich ende toecomende; by onsen lieven ende getrouwen den president ende luyden van onser rekeninghe te Ryssele, denwelcken wy insgelyx bevelen, dat alsoe te doene sonder swaricheden; want ons also gelieft, nyetteghenstaende enighe ordonnantien, restrictien, differentien, geboden ofte verboden ter contrarie.
Gegeven in onser stadt van Ryssele, den 14. dach van Junio, in 't jaer ons Heren 1537, van onsen rycke 't xviii, ende van Spangien, beyde Sicilien ende andere 't xxii.
Onder stondt geschreven:
Byden Keyser,
Die grave van Hoogstraten hooft.... Ruffault, heere van Neufville, tresorier generael; Huges van...., heere van Wingene, ridders; meysters Vincent Cornelisz., gecommitteerde vande financie ende andere tegenwoordich.
Ondert.: Pensaert.
Op de rugge stondt:
Die hoof tresorier generael ende gecommitteerde opt stuck vande domeinen ende financien ons heren des Keysers, consenteren alsoe vele als in hem es, dat inhouden in't
Auteursrechtvrij