inde Voerderstrate, gegeven zullen worden om goidswille, ende waert, dat die voern. lossrenthen geloeset worden, zoe sal men die penninghen, daervan comende, wederom beleggen by raede ende goedtduncken myns leenvolgers ende twee mannen vander broederschap van Starckenborch, om die voern. almissen altydt onderhouden te worden; ende oick zal men op myn eerste sevendach, yerste maenstondt ende ierste jaergetyde geven, tot elcke reyse een mud weits ofte meer, aen broot, den rechten armen, daer t' best aen bestaet zal wesen. Insgelycx zal men erfflick jaerlicx houden myn jaerichtyde ende mynder huysfrouwen ende beyden onsen anderen vrunden ende maghen, omtrent den eersten heligen dach nae myn sterffdach mit vigilie ende zielmysse, ende openbaerlick zal die pastoer bidden voir my ende vrunden voern. Des soe sal die kerck van Nederlangbroeck hebben voer hoer lichten acht Phs stuver, die pastoer vier Phs st. ende die coster twee der voern. stuver. Voert zoe sal oick alle jaer op ons lyeffs Heren hemelvaertsdach, die pastoer ende coster van Nederlangbroeck doen ende houden een schonen singhenden dienst, inde capelle van Starckenborch, van Sinte Gangulphus, patroon van Starkenborch, ende bidden voer alle die ghene, die inde voern. broederschap zyn, nemptelicken voer my ende vrunden voern., ende die inde vyffentwyntich hoeven ende oick inden gerechte van Starckenborch wonen ofte bouwen, daervan een memorieboeck wesen zal, van welcken dienst die voern. pastoer hebben zal vyff Phs st. ende die coster dardenhalven Phs st.; ende waert zaicke, dat die voern. pastoer myt den coster nyet en quame ten zelven daghe, om den voern. dienst t'doen, zoe zal die cappellaen van Starckenborch den dienst doen ende zall daervoer hebben met den zanger, die in des costers stede zinght, elcx dardenhalven Phs st., ende dese twee ende twyntichstenhalven st. zal men nemen alle jaer van twe acker landts, liggende achter vossen camer over den middelwech, die Beernt Harmensz. nu ter tydt
bruyct; ende alle die broeders vande voorn. broederschap, die opten voern. dach comen to Starckenborch ende aldaer misse hoeren ende offeren, ende aldaer by Starckenborch blyven eten, zullen elck van hem hebben een vaen biers; ende dat zalmen nemen van vier hondt landts, liggende thot Marssen, ende dat die voern. vier hondt jaerlicx meer gelden dan dat voirsz. is belooft ofte cost, dat zal wesen tot prouffyt vande capelle voern. Oick so sullen alle manspersonen, die inde voern. broderschap zyn, geven nae haer overlyden twelff Phs st. Insgelicx die vrouwen vande voern. broderschap zess Phs st. tot behouff vande voern. capelle. Oick zoe beset ick Eerst voern. die voern. capelle, tot hoere tymmeringe twyntich oudt schilden; die kerck van Nederlangebroeck twe oudt scilt; den pastoer aldaer eenen oudt schilt, ende de coster een halff oudt schilt; daervoer die pastoer, coster ende kerckmeesters myn sevendach, maenstonden ende eerste jarichtidt doen zullen ende mede thot myn graffste doen gaen. Voert zoe beset ick Eerst voern. all myn huissgesindt ende Goert Coenraetsz. myt Griet zyn huysfrouwe, elcx een oude schilt; ende Thonis, myn zoen, zal myn wytvaert doen, zoe dat behoert, daer ick begraven word, ende zal aldaer een behoerlicke epitaphium voer my ende myn huysfrouwe in steen doen houwen; ende ist zaecke, dat ick Eerst voern. bynnen Vtrecht offlyvich worde, zoe beger ick inde Doemskercke, in myn ouders grafstede te leggen. Oirkondt der waerheit, zoe heb ik Eerst voern. desen tegenwordighen breff myt myn zegel besegelt ende myt gewontlicke handteyken onderteyckent; ende om mere vestenisse, zoe heb ick Eerst van Ysenderen voern. gebeden die vesten, vromen ende strengen heer Jan van Renes van Wulven, ridder, Jan van Culenborch van Renswouw, als leenmannen der Keys. Mat. ende als vrunden ende maghen, desen tegenwoerdighen brieff met hoeren zegel mede te willen bezegellen. 'T welck wy Jan van Renes ende Jan van Culenborch ter bede Eerst van Ysenderen
voern. geerne gedaen hebben. Geschiet in 't jaer duysent vyffhondert driendarchtich, den dartichsten dach Marty.
(Gel.) Eerst van Ysenderen.
(Naar het origineel.)
Auteursrechtvrij