XII. Compromis aangaande het jus patronatus eener capelrie binnen der kerke van Overschie. (1533).
Opten dach van huyden compareerde inde greffe vanden hove van Hollant mr. Heynrick Aelbrechts zoen, priester, als gemaichtich ende des volcomen macht hebbende vanden eerwaerdighen heere den prelaet van Egmondt, zoe hy zeyde, ende meester Pieter Thomas zoen van Wormer, priester ter eenre, heer Adriaen van Renes, domheere tot Vuytrecht ende Adriaen, heer van Matenes, vervangende te samen Wouter van Matenes ter andere zyden, verclarende dat tusschen hemluyden comparanten veel ende diversche quaestien ende processen zyn geweest, soe voor den officiael vanden domprost tot Vuytrecht, zoe voor den deken van Naeltwyck, voor den deken van Sinte Pieters t'Uytrecht, als voer desen hove, ter cause van jus patronatus ende anders, gedependeert wesende van een capelrie op onser liever vrouwen altaer binnen der kercke van Overschie. Alle welcke haerluyder questien ende processen, hoedanich die wesen moegen, zy aling ende al gesubmitteert, gekeert ende gebleven hebben, ende submitteren mits desen als in arbitros juris oft amicabiles compositores, te weten van wegen den voersz. prelaet ende mr. Pieter Thsz., mr. Guillam Zegers raidt, ende van wegen Renes ende Matenes, mr. Joost Sasbout, oick raidt ordinaris vanden voorsz. hove, ende indien de voorsz. arbiters niet en connen accorderen, sullen moegen nemen tot een superarbiter mr. Herman Zuyderhuysz., oick raidt vanden hove, gelovende tgundt dat byden voirsz. arbiters alleen ofte metten superarbiter vuytgesprocken sal worden, t'onderhouden ende te volcoemen, op een peyne van hondert Karolus guldens, omme t'employeren, daer de voersz. arbiters 't zelve ordonneren sullen; ende indien eenige vanden partyen quamen by reductie oft hem anderssins beclaechden vande voirsz. vuytspracke, dat nyettemin deselve vuytspraecke hoeren voertganck ende executie hebben sal, op cautie, ende sullen de voorsz. comparanten elcx haer besceyt, daermede sy hemluyden willen behelpen, gehouden wesen te
leveren in handen vanden voirsz. arbiters, binnen drie maenden naestcoemende, ende sal d'uytspracke gescien binnen de drie maenden daernae, ende sal de voirsz. meester Heynrich tusschen middelretyde leveren acte van approbacie vanden voirsz. prelaet van Egmondt van deser submissie.
Gedaen inden Haige, den 26. January, 1533, stilo curie Hollandie.
In kennisse van my,
(Get.) R. Steynemolen.
(Naar het origineel.)
Auteursrechtvrij