Archief voor kerkelijke en wereldsche geschiedenissen, inzonderheid van Utrecht. Deel 5

[p. 293]

Gedenkstukken uit de XVI. eeuw, voornamelijk betreffende de Utrechtsche zaken.

I. Commissie voor Mr. Ja. van Goudt, om zekere opbrengst te ontvangen. (1507).

Floris van Egmont, zoen tot Ysselsteyn, heere tot Sinte Martinsdyck etc., Stadtholder Generael van Gelre ende overste capiteyn der landen van Hollandt ende Vrieslandt, van wegen des rooms Conincx ende onsen genadighen erfachtigen heere, den Eertshertoghe van Oostenryck etc.; allen den ghenen, die desen onsen letteren sullen sien of hooren lesen, saluyt; doen te weetene, dat alsoe 't belieft heeft onse genad. vrouwe, vrouwe Margariete van Oestenryck, hartoginne douwagiere van Savoye deur d'auctoriteyt, die heure Genade gebruyckende zyn, van weegen des roomschen Conincx ende onsen genad. ende erfachtigen heere voorsz. ons by expresse commissie te committeeren, tot versoucken vanden staten der voorsz. landen van Hollant ende Vrieslant, overste capiteyn te wesen derselver landen, omme overal binnen den steden ende opten frontieren regel ende ordonnantie te stellen tot resistentie vanden Gelderschen vyanden, over den capiteyn ende knechten, liggende in garnisoene, alzoewel binnen den voorsz. landen als oock binnen der stede van Harderwyck, ende alsoe wy bevinden, dat men denselven garnisoenen grooten menichfoldigen sommen van penningen schuldich is, ende dat men wel eenige cappiteynen ende knechten zoude mogen lichten, die by gebrecke van betaelinge tot noch toe onderhouden syn geweest, zedert den opbreecken by Pourroyen, ende om hierinne wel te versien, sonderlinge van noede is, mit alder haest op te brengen ende te ontfangen uyt allen quartieren der voirsz. landen allen den penningen, die men sal moegen recouvreren, op dat wy ons daermede sullen mogen behelpen, alsoe wy daertoe geaucthoriseert syn, ende dat soe wel van der beeden ordinarys ende extraordinarys vanden termyne vande Kersmisse laestleden als van der anticipatie vande termyne van St. Jansmisse naestcomende, ende dat boven desen oick mit aller diligentie ontfangen ende opgebeurt moeten wesen die penningen, by den voorsz. gemeenen landen geconsenteert totter onderhoudenisse vanden voorsz. knechten ofte payen, omme denselven betaelinge te doen hebben als 't behoort, voor den tyt van drie maenden ende anders, ende daertoe dat men tegenwoordelicken ommeslaen moet dertich duysent ponden, van xl groten Vlaems 't pont, ende want ons van noede is hiertoe te hebben eenen notabelen officier, die getrouwelicken alle dese penningen mach ontfangen ende ons daer off deuchdelicken respondeeren, omme in geenen saecken verachtert te wesen, ende dat ons seer goet rapport gedaen is vander discretie ende bequaemheyt vanden persoon van mr. Jacob Goudt, rentmeester generael van Noirthollant, ende overmerckende datter te meer costen ende ongerieffelicheyt wesen souden, indien wy dese penningen souden ontfangen uyt handen vande rentmeesters

[p. 294]

van Zuythollant ende Vrieslant ofte van anderen, overmits de diversité vanden ordonnantien, die by ons geexpedieert sullen worden, d'welcken by eenen persoon geconduiseert ende beleyt moeten worden, soe is 't, dat wy in den naeme ende van wegen als boven betrouwende den persoon vanden voorsz. meester Jacob Goudt, denselven gecommitteert ende geordonneert te hebben, committeeren ende ordonneeren mits desen alleen te hebben den ontfanghe, handelinge ende administratie over Hollandt ende Vrieslant, alsoe wel vanden penningen vanden beeden ordinarys ende extraordinarys vanden termyne van Kersmisse lestleden, ende van der anticipatie van Sint Jan naestcommende, ende oock vande penningen, die ommegeslagen syn off die men noch ommeslaen sal, voor d'onderhoudenisse van xvi^C knechten ofte payen voorsz., gevende den voorsz. meester Jacob volcomen macht ende speciael bevel, allen denghenen, uyt wiens handen hy, syne clercken ofte substituyten, by hun gecommitteert, eenige penningen ter cause voorsz. ontfangen ende opgebeurt sullen hebben, quytancie te geven, daerby bekennende alsulcke penningen ontfangen te hebben, daermede dan die steden, dorpen ende andere plecken mede volstaen sullen mogen, van 't gunt dat se onsen voorsz. genadigen heere ter cause van elck heure porcie vanden beeden, verschynende als voeren ende vanden ommeslach voorsz. schuldich mogen wesen, nyet jegenstaende, dat eenige steden ende dorpen hebben te contribueeren ende geseten syn buyten 't rentmeesterschap van Noirthollant, behoudelicken, dat den voorsz. meester Jacob van desen synen ontfanghe, handelinge ende administratie, reeckeningen, bewys ende reliqua doen sal voer ons ofte voor den gheenen die onsen genadigen heeren sal believen ter audicie van dien te ordonneeren, daer ende alsoe 't behoeren sal, tot alsulcken wedden ende salarys, als wy den voorsz. rentmeester van wegen ons genadigen heere ofte anders, daervan voer synen arbeyt, moeyten ende anders toe vinden ende ordonneeren sullen, 't welck wy hem mits desen alsoe beloeven te doene ende te laten volgen. In oirconde van desen zoe hebben wy onse gewoentlicke hantgescrifte hier onder gestelt, ende onse zegel hier beneden aen doen hangen opten x. dach in Januario anno xv^C ende zeven, nae den loep 's hoofs van Hollandt. Ondert.: Florys.

(Naar gelijktijdige kopij).