Archief voor kerkelijke en wereldsche geschiedenissen, inzonderheid van Utrecht. Deel 5

V.

Edele, etc., Heeren.

Myn Heeren. Ick hebbe UE. missive op eergisteren voor den noen ontvangen, dienende tot antwoerd van myne voergaende, ende by dewelck UE. begeren ende versoecken, dat ick volgens die resolutie vanden staten van Utrecht, op die laetste beschryvinge genomen, myn commissie noch soude continueren den tydt van drie naevolgende jaren, gelyck UE. myn 't selve, laetstelick daer wesende, hadden doen vermanen met vertrouwen, dat ick die heeren staten noch UE. 't selve nyet en soude weygeren. Soe sal UE. nochmaels believen te verstaen ende seeckerlick te geloeven, dat ick nyet sonder oersaecke daerinne zwaricheyt hebbe gemaect, ende dat ick nyet geerne enigen dienst soude UE. ontseggen ofte tergiverseren, als ick d'selve soude daer mede kunnen conplaceren ende gerieven, dan soe ick bevinde (stellende mynen goeden wille tegens myn geringe vermogen) dat ick daerinne noch UE, noch myn selven, genoech doen noch behoerlick contentement geven kan ('t welck myn gemoet bedroeft) soe is myn vrundtlicke bede, dat UE. believe, myn van dese becommernisse ende facheusen last wis te ontledigen ende te verlossen, daerinne ick in sess jaeren met groete moeyen heb getravailleert ende weynich voordeels gedaen, dat myn van harten leet is. Ick hebbe in mynen laetsten, sonder beveynstheyt, die redenen daervan breeder verhaelt; maer het scheynt, dat UE. die inden wynt slaen ende nyet en willen apprehenderen, hoe wel die nyet weyniger in haer egaert als van myn praegnant syn, ende UE. wel ander gevoelen souden geven, soe ick die naecter ende grondelicker hadde geopenbaert ende geposticulariseert, 't welck ick myn hebbe ontsien om beters wille ende om geen misverstanden ende meer passien te verwecken, die (Godt betert) onder die provintien nyet weynich en domineren, waervan die tydt nyet en lyt veel te verhalen, ofte UE. daermede te beswaren. Edoch om UE. believen ende aenhonden te accommoderen, soe verre my mogelyck wesen sal ende alle ..... ende derselver misnuegen te vermyden; soe ben ick te vreden hier noch te verblyven ende myn conditie te continueren tot d'aenstaende beschryvinge van UE., mits dat d'selve mynen voergaenden, met die redenen, daerinne vervat, alsdan sullen resumeren ende den staten van Utrecht voerdragen ende dit poinct optie bescryvinge stellen, opdat ick hoer edelen alsdan oick naerder berichtinge van myn voernemen sal mogen doen, ende op alles gelet worden naer equiteit ende naer merite van myne pretensie, volgens die belofte myn by

[p. 125]

UE. aengescreven, nyet tegenstaende by my andere resolutie genomen was, ende daer van dese veranderinge myn oick nyet wel te pas en compt, om myn particulier, nademael ick die huere van het huys, daerinne ick hier wone ende t'Utrecht, den luyden, die in myn huys wonen, overlange opgeseydt hebbe. Ende soe my nyet gelegen en sal wesen voer dien tyt voer myn familie in een herberge te logeren, sal wederom mogen sien een ander huys te becomen voer een half jaer, want het en is die gewoente nyet een huys te huren voer een maent twee ofte drye, ende daerbeneffens myn huys t'Utrecht voor gelycken tydt doen bewaren, daerinne ick alle provisie hebbe gedaen. Zoo hebbe nu UE. 't selve willen vermanen neffens ander ongerief ende moeyen, die ick daer doer desen te verwachten hebbe, opdat by gelegenheit daerop gelet mach worden. Verblyvende ende stellende alles tot UE. discretie, als oick, dat d'selve myn nyet en sullen qualyck afnemen, dat ick cortelinge tot Utrecht come, omme ordre te stellen, ende tot myne minste schade myn particuliere affairen te menageren. Ende soe desen vorders nyet en geschie, sal myn hiermede dienstelyck gebieden aen UE. goede gratie ende den Almogende Heere bidden,

Edele, erentfeste, wyse, voersienige ende seer discrete heeren, UE. te willen sparen in langduerige gesontheyt ende voorspoedige regieringe.

Uyt 's Gravenhage, desen lesten Sept., 1606.

UE. dw. vrundt ende medebroeder,

Niclaes van Berck.

Hier syn aengecomen, soe uyt Hollant ende Zeelandt veel coepluyden, uyt verscheyden steden gecommitteert, omme te beramen ende te concipieren een ordre ende forme, daer nae men soude mogen oprichten een unie nopende die negotiatie van Westindie, ende syn van desen dach af in besoigne getreden, omme daernae d'selve aen den staten generael te presenteren ende aggreatie daerop te versoucken. Als het overgegeven sal wesen, sal ick UE. copie daervan overseynden, omme UE. intentie daervan te mogen verstaen. Desen voermiddach is in onse vergaderinge ontboden ende gehoert een Engelsman, den lande dienende, als adelborst, die verclaert heeft, dat hy voorleden Donderdach tot Lonnen, omme herwers te vertrecken, gecomen was, ende sien daer al het volck sonderlinge vrolyck ende blyde te wesen, dat hy gevraecht hadde, wat er te doen mochte wesen, hy verstaen hadde, dat de peys tusschen Spangien ende Engelant gebroecken was, ende dat hy gesien hadde, datter veel schepen van oorloge inne gebracht werden ende geequipeert. Het schynt, dat die coning den coepluyden, die op Spagnien gehandelt hebben ende aldaer qualicken ende tegens het tractaet geforceert ende beswaert syn geweest, represtalia tegens den Spangaert geaccordeert heeft. Soe het waer is, het verlos van Berck sal haest vergeten worden ende ons weynich cunnen deren. Interim nyet gedivulgeert, alvorens scryvens sal gecomen wesen vanden heere Caron, daerna ons seer verlangt.

Opschr.: Aen mynheeren... den staten vanden lande van Utrecht, tot Utrecht.

R^a. 1. Oct. 1606.