De warachtighe fabulen der dieren

[p. 204]

[Iupiter ende Bije]

Niet quaets, maer goet,

Elck begheeren moet.

Prouerb. 30.

TOt God d'Heere die ouer al ghebiedt
Es van Salomon zijn ghebed gheschiedt
Heere! Aermoe ende Rijckdom en gheeft my niet
Emmers so lettel dat ick t'mijnen onghelucke
Mijnen euen naesten, niet onrechtelick verdrucke:
En zoo vele niet, dat ick van v zou keeren
Vwen naeme verzweeren, ende mueghen onteeren,
Maer decksels cleeren,, iont my alle myn leuen:
En wilt my mijnen noodtdurft alleene gheuen.

[p. 205]

Iupiter ende Bije.

ALzoo de BIje, den Goden om weder-gratie
Fauorisatie,
Dede sacrificie ende presentatie
Van t'best zuuerste zeem, wt huer gheneeren,
Midts welcken consenteerden huer accordatie
Datse t'dier spatie
Zulck als zou wilde, een begheerte mocht begheeren
t'Zoude huer gheworden, met een toezweeren:
Dies verzochte een bede, omme, die verweruen
Dat zoo wie huer zeem zoude dieftelick weeren
Van huer zijnde ghestraelt, terstondt zoude steruen:
Om eens proffijt, salmen niet t'ghemeente bederuen.

¶ Iupiter doe daer zittende als President

Was niet wel content
Midts dat gheen redene was. zoo hy wel heeft verstaen
Heeft dies ghezeyt, en ghewilt met den Goden consent
Dat wien de Bije, om stralen zou commen ontrent
Ende hueren strael zoude int vleesch ontfaen
Zoude zelue dan steruen zaen
Daer mede zyn te vreden, zonder breeder verhael:
En van doe voorts, was ter conclusten t'vermaen
Huer leuen zoude alleene ligghen in hueren strael,
Consideratie int recht, es een groot principael.

Desghelijcx wie weynscht, verzouct, of begheert,

Dat zijn naesten deerde:
Ende om hem ouvervallen met onghenaden
t'Ghebuert, dat God met zijn rechtueerdich zweert
Dat van d'onnoosele weert:
Ende op-zendet d'andre t'huerlieder schaeden,
Die ongodlick baeden.