De warachtighe fabulen der dieren

[p. 202]

[Leeu ende Museken]

De groote hoe vroom en coene,

Hebben somtijts de cleene van doene.

Prouerb. 27.

BEter eist een goet ghebuer t'hebbene by
Dan eenen Broedere die verre zy
Elck anders hulpe zyn in tsweerelts steden,
Onder een hooft zijn diueersche leden.

Eccl. 3.

HOe ghy grooter zijt
Hoe ghy altijt
V meer zult booghen:
Zoo vindy mede
Ghenade en vrede,
Voor sHeeren ooghen.

[p. 203]

Leeu ende Museken.

DEn Leeu heeft onder eenen Boom gherust
Daer Ratten nestelden, en Musen pepen
Hy die slapens hadde zeer grooten lust
Ontrent hem te loopende, hebben niet ghesust
Ten eynde wten hoop heeft een Muusken ghegrepen:
t'Welck hem heeft zeere sterck ghenepen
Om te moghen ontghaen sperteldet zeere,
Den Leeu nochtans wildet dooden noch slepen
Hy liet t'Muscken loopen, en dacht op dees leere:
Dat de groote de cleen verdrucken, en es gheen eere.

¶ t'Muusken koos zyn Holleken, den Leeu nam zyn ghanghen

De zulcke es gracie gheschiet, die gratie hiesschen
t'Ghebuerde, den Leeu wiert daer ontrent gheuanghen
Zijnde inde bedwanghen
Verlost te zijne, hadde groot verlanghen
Dies wist hy gheenen raedt dan om hulpe te briesschen:
t'Muusken hoord'hem door velden en driesschen
Es derwaerts gheloopen, ghewillich bouen maeten
Vandt hem int net ouerstroopt, van t'hooft totten liesschen
d'Welck hy allijncx in sticx knaeghde t'zijnder baeten
Dus wiert den Leeu, oock vrij en los ghelaten
d'Een mach den ander hulpich zijn, in alle staten.

By exemple wacht v (hoe hooghe ghezeten)

De cleene te mesdoene, daer ghi mueght
Want ghy en cont gheensins gheweten
Hoe datse v mochten hinderen, ofte mueghen doen dueght,
End' hoe sterck inde iueght,, of ghedient te dancke
Die dueght int lijf heeft, sal hinderen gheen crancke.