De warachtighe fabulen der dieren

[p. 198]

[Raue ende Schorpioen]

Die wreken wil alle zaecken,

Crijght veel wederwraecken.

Deutero. 32. Leui. 19. Eccli. 26.

DE wraeke es mijne (zeght d'Heere) in alle faeyzoen
Ick salt loonen in tijde, en bouen desen
Ouer mijn volck, zoo sal ick recht doen
Ende met mijn dienaers bermhertich wesen
Zouckt dies gheen wraeke, t'es zeere mespresen:
Zoo hy my ghedaen heeft, zeght gheensins niet
Zoo sal ick hem oock doen, want zoo ghy muecht lesen
Wie ghewroken wil zijn, wraecke wort hem gheschiet
Zoo Christus biedt,, loont quaet met goet
Vergheeft uwen naesten die v hinder doet.

[p. 199]

Raue ende Schorpioen.

Een
Raeue
Die scheen
Te zijne slaeue
Van t'veninich schorpioen
Wasser zeer af ghepijndt
En totter doot by ghevenijndt
In zekere voorleden faeyzoen,
De Raue die dochte // datse mochte
t' Dier causen huere weder wrake doen
Heeft t'schorpioen // clouck coen // ghegrepen vast
Maer wracke (als zommich) brocht huer zelf int last.

¶ Want quaet ieghens quaet // t'Meeste quaet verwint

t'Schorpioen wtschoot // Zijn venijn terstont
Raue heuet ghevaett // De moedt wiert ghedint
In flau grooten noodt // Zou vp-zwal rondt
Van cleen noch groot // Wiste hulpens vondt,
Zou bleef in smerten // Sufelende dweers:
Veel weere boodt // Eerst zijnde ghezondt
t'Venijn track ter herten // Zangh huer eynde veers,
Den steert schorpionich // Doorsneet huer als een scheers.

t'Sghelijcx eist loos ieghens vind wel een loosere

De vrome vindt wel een stercker dan hy
Een snoo boos ketijf, vindt een schelm wel loosere
Een wouckeraer, vindt hem een banckeroute by
Een dief comt wel daer een roouere zij,
De vechtere vindt hem bij de moordenare
De gheck gaet vande quae beschimpers niet vrij,
Ionghe diefkens vinden, datmer gheen coorde spaere.