De warachtighe fabulen der dieren

[p. 196]

[Leeu ter iaght met ander beesten]

In eerderijcke

Antiert dijns ghelijcke.

Roma. 13.

BEtaelt een yeghelick dat ghy zijt schuldich
Wien tribuurt, dien tribuut zuldy gheuen,
Wien tol, zult oock gheuen ghehuldich
Wien vreese, gheeft vreese, niet onverduldich
Maer als wt ionsten daer toe ghedreuen:
En wien ghy eere schuldich zijt, eert hem int leuen
Hoe hoogh ghy zijt verheuen.

Eccli. 8.

MEt de gheweldighe en twist noch kijft
Op dat ghy niet t'onder en blijft
Twist niet met de Rijcke, staet hem niet teghen,
Op dat hy v niet en zoude ouerweghen.

[p. 197]

Leeu ter iaght met ander beesten.

DEn Leeu int regieren
Prince vande viervoeteghe eerdtsche dieren
Metter Coe, Schaep, en andre de iaght aen namen
Ten Bosschewaerts in, duer neerstighe manieren
Hopende den vangh te deelene t'samen,
Elck naer zyn betamen:
t'Ghebuerde, loopende door Bosschen en Bramen
Dat zy vonden eenen Hert ghevoedt buter maten
Die zy bespronghen tot zijnder onvramen
Ende zonder verdragh, moester t'leuen laten,
Die vermenight es, wat can hem cleen weere baten.

¶ t'Venoysoen zoudmer deelen doe opennaer

Maer,
Den Leeu sprak: d'eerste deel es d'mijne
Ter causen dat ick bem v Heere voorwaer
Ende daer naer,
t'Weede deel zeyd'hy oock te wesen zijne
Midts dat hy hadde ghenomen de meeste pijne
Int loopen ten fijne:
t'Derde deel oock, als hebbende meest foortsen ghedaen:
Wie ieghens t'vierde zeght, met eenen grammen aenschijne
Wilde hy wreedelick ieghens hem opstaen:
Beter ghegheuen, dan met foortsen ontfaen.

Met eenen die meerder is dan ghy

Hoe mynder by zij,
Wacht v daer mede hebben te doene:
Want hoe ghy hem in volght ende staet by,
Als hy wil, mach hy
Dijn selfs onvry:
V hinderlick wesen t'eeneghen faeyzoene.