De warachtighe fabulen der dieren

[p. 190]

[Vlaemsche ende Turcksche Hane]

Vremde lieden die niet en hinderen,

Salmen lijden, als eyghen kinderen.

Leuite. 19.

EIst dat een wtlander of van ander gheslachten
Onder v verkeert of woond, en zult mids desen
Hem niet verwijten, versteken, of veraghten,
Maer sal als een ingheboren onder hulien wesen:
Ende sla by v zijn bemindt en ghepresen
Ghelijck ghy v zeluen lief hebt zonder benijden
Want al zijt ghy by fortune hoogh gheresen
Gy hebt zelue vremdelijnghen gheweest voortijden
Dus wilt hem payslick onder v verdraghen en lijden.

[p. 191]

Vlaemsche ende Turcksche Hane.

EEn Vlaemschen Hane, cloeck vueghel crayere
Int Landt gheen fraeyere
Zoo hy ghijngh wandelen meest alleene:
Zijnen cam lustich root stondt als der Hinnen paeyere
Cam daer by een Turckschen Haen wel te beene
Vremt faetsoenich, want wonderlicker isser gheene
Dies d'Hennekens en tijtkens waren verwaert
Nochtans wandelde paeyslick, mede groot noch cleene
Maer heeft hem vriendelick by hemlieden ghepaert:
Den Vlaemschen ghingh al steppende t'hemwaert
Stack met spooren, en heeft hem zeere ghepijnt,
Menich lett dat de zonne in d'water schijnt.

¶ d'Wtlandtsche Hane zach dat hy niet vrij zijn mochte

Al heeft hijt ghezocht,
Heeft hem zeluen ter noodtweere vp ghestreken:
Den Vlaemschen viel niet slijncx, hy is daer gherocht
Maer wierdt ter deghen van d'ander ghesteken
d'Onnoosel tijtkens t'ghevecht van verre keken
Emmers den Vlaemschen behieldt de bane,
Dies zangh hy victory, en de zijn vlercken queken
Midts dien auenthuerden d'Hinnekins wt te ghane,
Zy boghen hen onder hueren Coppin den Hane
Hij bevlerctese, zy ghedoochdent, en waren blijde:
d'Wtlandtsche vreesde noch eens an te stane
Dies vertrack hy beschaeme an d'eene zijde,
Een goet Huusman oyt gheern zyn ghezelschap bevrijde.

Insghelijcx zommich ziet een van vremder natie

Den noodtdurst bezouckende om mueghen leuen
Zij doender afionstich op murmuratie
Niet rustende voor zij hem hebben verdreuen.