De warachtighe fabulen der dieren

[p. 188]

[Ghier ende cleen voghelkens]

Onder dueghedelick ghelaet

Schuult dicmael bedroch en quaet.

Psalm. 5. ende 13.

DIe bloetghierich en bedrieghelick zyn van zede
Sal den Heere verachten t'alder stondt:
Met huer tonghen, daeden zy bedriechlichede
Een open graf es haerlieder keel oock mede
Vol vermalendidijnghe is haerlieder mondt:
Slanghe venijn is onder huerlieder tonghen grondt
Vol bitterheyts ende quaets zijn zy int ghemoedt
Huer voeten zijn rasch om wt te sturten bloedt.

Iere. 2.

TBloedt van d'onnoosel zielen voorwaer,
By stonden,
Es in uwe vlueghelen openbaer
Gheuonden.

[p. 189]

Ghier ende cleen voghelkens.

DEn Ghier (zoot scheen) met een blijd aenschijn
Wilde houden een festijn,
Daer toe hi hadde veel cleen ghevoghelte ghenoodt
De vergaderijnghe zoude in een tempel zijn,
Die daer toe bereet, ende beschickt was fijn:
Datser op een zeker termijn
Commen zouden, hy vriendelick ontboodt
Zoo hebben zy ghecommen in ghetale groot
Ter maeltijt by hem blijuende, hebben zij ghe'eten
Vele goe beten:
Maer den Ghier doen terstont de duere toe sloot
En brachter vele ter doodt:
d'Een vooren, d'ander naer, zonder vergheten,
Zulck waent wesen by Vriendt es by vyandt ghezeten.

Insghelijcx onder t'dexel van een schoon ghelaet

Schuult valschen raet
Aerch feninich quaet
Heymelick nijdt haet
Om wt zaeyen boos zaek
Ten zijn oock niet al vrienden, die vrienden schijnen
Weest voorsienich, ziet wie ghy in uwen staet
En ghezelschap ontfaet,
Hoe dat ghier mede ter trauwe ommegaet:
Zulck lacht, t'herte is vul bitter brijnen
Laeghen legghende om de simpel te pijnen
En om die teenemael te crijghen ten valle
Elck zij op zijn hoede, voor die veel grijnen
Worpende, quetsen zij met een zochten balle,
Zoet zeem can zulck wel mijnghelen met bitter galle.