De warachtighe fabulen der dieren

[p. 186]

[Gheete ende t'ionck vvulueken]

Zulck eenen vp-voedt,

Die hem haermaels ontgoedt.

1. Ioan. 3. Prouerd. 25. Luce. 3. Eccli 4.

DIe tsweerelts goed heeft, en zyn broeder ziet lijden noot
En sluut zyn binnenste toe, tot hem openbaer
Hoe blijft Gods liefde in hem? gheensins, maer es doodt:
Hebt lief metten wercken, ende waerheyt een paer
Vwen vyandt zult spijsen, ende lauen daer naer,
End' een honghereghe ziele niet en versmaet:
Wie tot bermherticheyt gheneghen es, sal voorwaer
Ghebenedijt werden, dus gheen benaude af-gaet,
Wie spijse heeft, den ghuenen die gheen heeft, by staet.

[p. 187]

Gheete ende t'ionck vvulueken.

EEn Gheete ghebaerdt
Ionckiueghdich gheiaert
Vul goeder aerdt
Hebbende niet quaets in huere gronden
Hueren Meester en elck
Voedt zy met hueren melck:
Ende zoo zou t'stalle eens was ontbonden
Ghijngh wt wandelen, ende heeft gheuonden
Int veldt alleene
Een ionck Wuluecken cleene:
t'Welck, alst de Gheete hadde gheooght,
Cam rasschelick t'huerwaerts, en ghewillich t.dien stonden
Heeft zout lijdzaemelick gheerne ghezooght
Liefde, ionste betooght:
Ende dickwils menichwaeruen zoo meer ghedooght
Want het leyde de Gheete an veel valsche laghen
Nochtans om t'Wulueken voesteren heeft neerstich ghepooght
Zoo dat wterlick sterck wiert, en oudt van daghen
t'Volghde huer dickwils duer busschen, duer haghen,
Maer met een versaeghen
In huer zeluen dijnckende, als ickt wel aenzie:
Hoe wel dat ickt mach goe ionste draghen
Zalt noch beclaghen
Daer by commen in plaghen
Want ick vp-voede myn natuerlicke partije
Zoot gheschiet t'allen tije
Die dus verwacht toeuerlaet
Queect op den ghenen die hem zeluen doen quaet
En bezitten zijn staet
Zelden yemant van wel doen, veel dueghts ontfaet.