De warachtighe fabulen der dieren

[p. 178]

[Schildtpadde ende Haze]

Zoorghneerstich ghezint

Sterck voornemen verwint.

1. Corinth. 9.

DE ghuene die loopen, ter baere met hoopen

Zoo elck es wijs

Allegader om winnen zy loopen

Maer eene behaeldt den prijs

Die neerstich propijs,, int loopen verhueght:

Ende loopt zoo, dat ghy vercrijghen mueght.

 

 

Eccl. 3.

IN al uwe wercken zijt snel bouen al,
Ende gheen ziecte v ouercommen sal.

[p. 179]

Schildtpadde ende Haze.

DEn Haze zijnde byder Schildtpadde ghezeten
Heeft huer traecheyt verweten
En dat hy inde voeten was rasscher en snel,
Heeft ieghens huer verst wech te doene vermeten
Onghelijck dan de Schildpadde zoude wel
Den Haze van prijse dede een vpstel
En ghegheuen de langhde, dier eerst zou gheraken
Zoude den prijs winnen, ende niemandt el
Beede hebben gheconsenteert inde zaecken
Loos es hy die wel op zyn hoede can waecken.

¶ t' Ghijngh toe, den Haze naer zyn legher vertrack

Rusten in zijn ghemack
Op zyn lichten loop stelde gheheel de zinnen
Maer inde Schildpadde gheen neersticheyt ghebrack
Al schoonkens allijncx ghijngh zou beghinnen:
Den Hase die dochtet in tijts al winnen
Op zyn eeghin beminnen
Smoorghens wtliep, meender eerst t'zijne: maer
Eer dat hy ter langhe gherochte binnen,
Hy ghemoette de Schildpadde, en keerende daer
Die op hem zeluen betraut, staet wanckelbaer.

Sghelijcx zaeken beminnen met haestichede

Zoorgvuldighe zede
Ende by moeten daer in ghedueren
Zullen bet worden vulbrocht met vrede
Dan datment op wanckelbaer stercten dede
Van rasch voornemen, const noyt goet eynde ghebueren
Maer allijncx voort ghaen, achterhaelt t' alleen bueren