De warachtighe fabulen der dieren

[p. 176]

[Vos ende Buck]

t'Eynde uwer wercken,

Wilt ouermercken.

Deutero. 32.

VOorpeynst ende weest voorsienich mede
Datmen t'huwaerts niet zegghe door t'meshagen
Tes een volck zonder raedt, en voorzienichede
Och of zy wijs waren, en verstonden t'allen daghen,
End' haerlieder wterste, wel voorzaeghen

Eccle. 7.

IN al uwe wercken zoorchvuldich vry
Ghedijnct dijn wterste, wel toe ziet
End' inder eeuwicheyt, en sult ghy
Zondighen niet.

[p. 177]

Vos ende Buck.

MAer een half vul steenpit ghijngh Vos en Buck drijncken
Lieten hem d'een voor d'ander naer zijncken
Tot dat zy totten water beede waren beneden
Ghedroncken, beghonstmer om wt-gheraken dijncken
t'Vos den Buck bad, te staen ouer hende op zijn leden
Vos vp t'hooft spranck, en zoo voort wt met lichticheden
Hadde belooft zou den Buck daer naer wt-reecken
Beghecte hem met zijn wijse baerdt, t'zijnder onvreden
End' alleene t'dien steden
Liet hem van deighs int watere weecken
Menich worter bedroghen duer schoon listisch smeecken.

¶ t'Vos gheckende vertrooste den Patient

Hem van bouen ontrent
Berespte dat hy wijser gheweest hadde niet
Noch voorzienigher het voorpeynst den eyndt
Hoe zoorchvuldich gent
Zijn wt-gheraken mochte zyn gheschiet,
Den Vos vertrack daer naer, en den Buck staende liet
Hy mochte raedt zoucken (zey t'Vos) in zijnen baert
Den Buck wiste gheen middel, bleef int verdriet
Hoe hem anders deert yet
Was emmers daer vanden viere bewaert:
Die t'eynde voorpeynst, heeft een wijsen aert.

Zoo eist niet al ghenoech veel beghinnen

Ter weerelt binnen
Ende daer in onzoorchvuldich bremen:
Maer tes meest noodt met voordachtighe zinnen
Om zwaricheyt dinnen,
En gherusticheyt winnen
Voorpeynsen hoe alle dijnck mach eynde nemen.