De warachtighe fabulen der dieren

[p. 170]

[Catte en t'Hane-kiecken]

Gheen oorzaecke zoucken,

Om quaet doen roucken.

Iob. 36.

LAet v van die gramschap niet verwinnen
Dat ghy met die quade zinnen
Om yemandt verdrucken, yet zoudt beghinnen

Roma. 2.

GRampschap ende onweerdichede
Tribulatie ende banghicheyt mede
In alle ziele vanden mensche die quaet doet
Maer glorie, eere, ende vrede,
Alle de ghuene die doen goet.

[p. 171]

Catte en t'Hane-kiecken.

EEn Catte heeft
t'Hanekiecken bespiedt
Met opene claeuwen ghegrepen vast
Zeyde t'hadde ghesneeft
Oneerlick gheleeft,
Dies moestet verdriet
Daeromme lijden, ende zijn anghetast,
Hebbende ghedaen als onredenlick ghast
Dickwils zyn moer en zijn zusters bespronghen:
Met craeyene oock doende den slapers groot last
Dies t'eynde veers moest van hem zijn ghezonghen
Die in ts'vyandts handen es, die es zeere bedwonghen.

¶ t'Hanekiecken badt

Zeere op dat pas
Op dat gracie zoude moghen ontfaen
Want t'zeyde plat
Ende daerlick dat
Zijn natuere was,
t'Ghuent hy ghedaen hadde, ende dies niet mesdaen,
t'Crayen baeterder al niet, maer t'moeste aenstaen
De Catte hielder vast voor een snoo ketijf
Zou beet t'kiecken de neck in, ten mochts niet ontghaen
Want zatter vp met huer claeuwen te stijf:
Zonder schult behoortmen niemandt te nemene t'lijf.

Insghelijcx ghebuert daermen den nick op crijcht

Men t' verwoede op tijcht
t'Zij beschuldich, onbeschuldich, es inde ooghe groot
Ten baetter vooren ghebeden, of datmer nijcht,
Weder by claeght, ofte dat zulck zwijcht:
Elck roupt bloetghierichst, hem t'hebbene doodt.