De warachtighe fabulen der dieren

[p. 164]

[Aerbeyder ende zijn honden]

Redenlick altijt,

Op dijn huusghezin zijt.

Eccle. 7.

HEbdy Beesten, draechter vp ooghe-merck
Te haestelick zultse niet ontlijuen,
Ende ist dat zy v meer dan int werck
Profijtelick zyn, laetse by v blijuen.

Eccle. 4.

VVilt gheensins binnen v woonste oft erfdeel
Als een Leeu zijn, wreedzinnich op eenich termijn
Omme worpende de ghuene die onder v zijn:
Maer discretelick tooghen een vriendelick aenschijn.

[p. 165]

Aerbeyder ende zijn honden

EEn Aerbeyder wien noodtzaecke heeft ghedeert
Veel hebbende verteert,
Bracht Lammers, schapen, en ionghe caluers ter doot
Die hy insghelijcx al tsamen heeft op ghesmeert
Bijden waermen eerdt,
Zoo dat hem niet meer en ouerschoot
Dan twee Ossen, die hem hielpen in noodt
Om zyn Landt te oeffenen, en te maken ghelt
Daer by hy mocht ghecrijghen zyn daghelicx broot
Maer heeft die beede om eten oock neder ghevelt
Ten wtersten lijden meest d'onnoosel gheweldt.

¶ Zijn hof-honden dit ziende, elck anderen spraken

Wat willen wy doen? wat zullen wy maken?
Naer dat ons Meester zoo onredenlick zy
Dat hy niet en spaert in zijn noodtzaecken
Maer willet al caeken
Wy Honden en sullen oock niet ghaen voorby
Tis al op gh'eten, hadde hy v ende my
Dus laet ons ghaen schoyen ouer velt ende Landen,
Daer wy van zulck een stocker werden vrij:
Beter in tijts vluchten, dan commen in handen.

Insghelijcx salmen t'ghezelschap vlieden

Van die huer eeghin huusghenooten mesbieden
Ende de ghuene diese doen eenich leedt:
Want ontwijselick alzulcke Lieden
Al macher schoon ghelaet gheschieden
Zooment dicwils weet,
Ieghens andre zullen oock wesen wreedt.