De warachtighe fabulen der dieren

[p. 162]

[Paeuvven en Acxtere]

Op ander lieden goedt

Draeght gheenen moedt.

Eccle. 11. a 4. Act. 12. c 21.

IN den dach uwer eeren
Zuldy v niet exalteren
Tot houeerdie v keeren:
Noch in v moye cleeren
V eenichsins glorieren:
Maer v meer verneren.

Apoca. 16.

DIe zijn cleederen bewaert, zalich es hy
Op dat hy onvry
Niet naect en wandele, ende midts dien:
Dat zy zijn leelicheyt niet en zien.

[p. 163]

Paeuvven en Acxtere.

DEn Acxter niet te vreden met zijn plumaygen
Opgheheuen in couraygen
Heeft hem met plumen van een Paeu becleedt
Hem daer mede vertooghende in veel passaygen
Hoogh-steppende, ghaende zoo moy en breet,
Van d'ander Acxters doende een gheheel af-scheet
Wilde int ghezelschap vanden Paeuwen verkeeren:
Dus heeft hy hem so moylick derwaerts bereet
En dochte in zijn beleet,
Zouden hem (als huer mede-ghezellen) eeren:
Eenen dief mach wel schulen onder moye cleeren.

¶ Den Acxter terstont ghijnck, beyde niet spadere

Hem dacht hy was een Paeu, in vleesch en adere
Dies can hy properlick in ghestuumt
Daer veel Paeuwen stonden te gadere
Hem ziende zoo becleedt, niet zijnde ghecostuumt
Vielen hem dapperlick an en hebben gheel ontpluumt
Hem bloot stellende, van bouen tot beneden
Naect danssende, es hy met schanden gheruumt
Zijns ghelijcke te zoucken, moest hy zyn te vreden:
Meest d'houeerdighe gheesten, zijn vul ydelheden.

Omrijnght v hooft gheel met Laurieren

Deckt v lijf, en willet verchieren
Met ghesteenten ofte goudt dierbaer
Ten baet niet een haer
Zijt ghy hedent in manieren
Eenen Boer in dijn anthieren,
Boer zijt ghy, ende Boer blijfdy eenpaer
Hoe ghy v vercleedt, v wesen volght v naer.