De warachtighe fabulen der dieren

[p. 154]

[Arendt ende Raue]

Bouen v macht yet,

Wilt begrijpen niet.

Eccle. 3. Prouerb. 25.

DInghen hoogher dan ghy, en wilt niet zoucken
Noch die stercker zijn, niet onderwijnden zijt
Maer wilt veel eer met zoorchvuldich vercloucken
Dat v God beuolen heeft, bedijncken altijt
End' in veel zijnder wercken, hooghwonderlick wijt
Wilt niet curieux zyn, maer v bedwijnghen:
Want tes v niet noodtlick om wesen bevrijdt
Met v ooghen te ziene verboorghen dijnghen.

[p. 155]

Arendt ende Raue.

DEn Arendt commende van Hooghe ghevloghen
Naer een ionck Lammeken was hy gheneghen
Vlugghe der vp beetende, heeft hem gheboghen,
Ende zijn scherpe claeuwen inde wulle ghesleghen
Vast grijpende, heuet wech inde lucht ghedreghen:
De Raue dit ziende, wildet doen naer,
Koos een Schaep om grijpen buten t'behoorlick pleghen
Verwerde inde muile, t'was om draghen te zwaer
Hoe zy meer vlercte om af-vlieghen, meer verwerde daer
Waender t'hebben claer, maer bleef int verdriet
d'Eene heeft t'gheluck, daer een ander op ziet.

¶ Schaepheeder dit ziende nam derwaerts de ghanghen

De Raue meend'hy grijpen, was ter wulle gheuanghen
Ende heeftser ghegrepen af metter handt:
Hoe zy track en vlercte, zy bleef inde bedwanghen
d'Heerder heeftse ghecort-vlerct, en wierpse an eenen cant
Mochte doe wandelen daer achter t'landt
Zonder verre vlieghen, ende nederwaerts kijcken,
Ten es gheen redenen, mach wesen t'verstandt
Dat wy ons willen by ons Meesters ghelijcken
Die bouen zijn macht heft, t'sal hem bezwijcken.

Oock mede vijndmen ghierighe dwaesen

Die de machtighe hebben zien doen profijt
Willen groote zacken vullen met ijdel cabaesen
Hebbende gheen macht te gheender tijt:
Menich oock zijn costelicke iueght verslijt
In begrijpen veel zaeken bouen zijn cracht,
Daer hy in verwart blijft: Dus wie ghy zijt,
Aenueerdt niet te doene bouen uwe macht.