De warachtighe fabulen der dieren

[p. 152]

[Vvolf ende t'Lammeken]

De quae zouct alle oorzaeke.

Op d'onnoosel te doen wraeke.

Gene. 9.

VVie vanden menschen, ghesturt sal hebben bloet
Zyn bloet, sal byden menschen ghesturt zyn daer
Want God heeft (als Heere almachtich goet)
Den mensche naer zijn beelde ghemaect voorwaer.

 Matth. 5.

ZO wie hy zy, die zonder zaecke op eenich termijn
Om op zijnen Broeder vergrammen doet pijne
De zelfste die sal weerdich zijn,
Van oordeel ghepijnicht te zijne.

[p. 153]

Vvolf ende t'Lammeken.

EEn grijpghulzich Wulf quaet van maniere
Ende een onnoosel Lammekin goet
Droncken beede tsaemen wt een Riuiere
De Wulf bouen, en t'Lammeken goedertiere
Beneden stoet:
De Wulf meest zouckende t'Lammekens bloet
Zey datter waeter beroerde met zijnder voeren
Ick en doe (zey t'Lammeken met grooter oodmoedt)
Ick beneden, cant tuwaerts op niet beroeren
Die twist zouct, sal altijts eerst rumoeren.

¶ Ten baette t'Lammeken gheen excusatie

Noch murmuratie,
Ghesmeect, ghestopen, gheneghen, ghebeden,
t'Wierdt vanden Wulf verbeten zonder gratie
Ende zyn bloedt hebbende, was te vreden:
Tsghelijcx ghebuert ten, menighen steden
d'Onnoosel (al doet hy niemant quaet)
Moet buughsamich wesen, en zijn te vreden
Datmen hem toe-scrijft menighe voose daet,
Daer den thuyn leeghst es, men meest ouer gaet.

Ock mede comtmen lichtelick te naer

De machteghe, met een zaecke cleene
By den welcken zij nemen oorzaecke openbaer
Daer mede zij d'onnoosel brijnghen in weene,
t'Meeste ghelijck willen zij houden alleene
t'Moet al goet zijn, dat wort by hemlieden ghedaen:
Dieder ieghens op rijst, die es rechts eene,
Wiens regnatie sal niet langhe staen