De warachtighe fabulen der dieren

[p. 148]

[Hauick ende Nachtegaele]

Noodtzaecke aenveerdt

En ydelheyt weerdt.

1. Regum. 2.

VVilt niet afkeeren naer ydel dijnghen
Die v gheensins sullen baeten
Noch moghen gheen verlossinghe anbrijnghen
Want zy ydel zijn bouen maeten.

Psalm. 143.

DE mensche is der ydelheyt gheleken
En zulck is hy,
Zijn daghen als een schaduwe bezweken
Ghaen voorby.

[p. 149]

Hauick ende Nachtegaele.

EEnen honghereghen Hauick greep in zyn ghemoet
Eenen Nachtegael goet
Die menschen en Voghelen verheughen doet
De welcke hy meende plucken en bederuen
Maer den Nachtegaele badt met vleyen zoet
Dat hy mochte gratie van hem verweruen:
Hy zoude (zangh hy hem) in alle plaetsen en eruen
Hem dienen, eeren, en doen al dat hy wilde,
Die in tsvyandts handt is, is int belouen milde.

¶ Dees reden den Hauick ghenouch behaeghde

Dies hy vraeghde:
Wat dienst dat hy hem zoude bewijsen?
Ick sal v (den Nachtegaele doe ghewaeghde)
Wt der borst ghaen zijnghen, tot sgheests veriolijsen
Een vroylick Liedt, d'welck ghy zult prijsen:
Neen (zey den Hauick) dat en begheere ick niet
t'Ghezangh en can my den buuck niet spijsen
Naer dat den buuck vul is, smaeckt best een liedt.

Sghelijcx salmen lieuer neerstich waken

Om crijghen de noodtzaecken:
Dan achten op d'ijdel ghenouch;ickheden
Die de Iongheleurs en die lichte vueghels maken,
En zoo an ghelt gheraeken:
Gheckende met die zoo haer gheldt besteden.