De warachtighe fabulen der dieren

[p. 146]

[Beer ende Bien]

Lieuer wat verdreghen,

Dan vyandtschap vercreghen.

1. Petri. 1.

AL eist dat ghy nv lettel tijts lijdt
En op de weerelt wort ghequelt en vertorden
Ghy sult v verhueghen, ende wesen verblijdt
Op dat die prouuijnghe dijns gheloofs altijdt
Costelicker dan goud mach gheuonden worden.

Prouerb. 16.

BEter es een die lijdzamich wesen can
Dan een sterck man,
En die zijnen moedt can dwijnghen in vreden
Es stercker dan:
Den verwinder van Sloten en Steden.

[p. 147]

Beer ende Bien.

DEn Beer hadde gheern een portie zeems ghehaelt
Zoo hy dede onghefaelt
Dies wiert bestoormt, en vande Bien ghestraelt
Waer duer hy es haestlick wreedt gram gheworden:
Midtswelcken in weder wraecke betaelt
Heeft al de Bie-buucken onder voeten vertorden
Al de Bien in ghedruussche dies wte porden
Eerst ziende huer huzijnghen verderuen openbaer
Hueren noodtcost wech draghen (zoo wildijt ingorden)
End' onnomelick veel ionghe Bien ghedoot hier naer
Zijn hem al op t'lijf ghezwermt, ghezeten in zijn hair
Alst t'lijf cost goed of eere, moetmen toezien daer.

¶ Zijn pilse was dicke, eer zij daer duere cropen

Hem te min moghen deeren, was al zyn hopen
Maer hooft, ooghen, ooren, mule, hebben meest bezocht
Daer aen ghewrocht:
Daer creegh hy ter deghen scherp straelende nopen
Voor tzoete ghelaeft, met bitter syropen
Zulckerwijs was bynaest ter doodt ghebrocht:
Hy verschudde zijn vel, es wech slumende ontrocht
Zegghende ieghens hem zeluen int vertrecken,
Hoe veel beter hadt gheweest (hadt my goet ghedocht)
Een strael verdraeghen, dan zoo veel vyanden wecken
De zulcke wort ghewondt,tmach een hondt af lecken.

Zoo eist oock beter iniurie lijdzamich verdraeghen

t'Welck inbrijnght meer baeten
Dan wraeck ghierich t'zijne, met kijuen of slaeghen
Vloecken en plaeghen
En vyanden op roeren in corten daeghen
Die eerst paeyselick zaeten,