De warachtighe fabulen der dieren

[p. 138]

[Huusratte ende Hoestere]

Om t'leckerlic leuen,

Comt menich in sneuen.

Hebr. 12. ende Eccle. 23.

OM een spijse die Esau heeft ghezocht
Heeft zyn recht der eerster gheboorten vercocht
Maer bet bedocht, heeft de wijse man ghebeden
Heere, neimt my af, des buucx begheerlicheden.

Eccle. 37.

OVer alle spijse wtsturt v niet
Want in veel spijsen, sal ziecte zyn gheleghen
En die begheerlickheyt, sal voortcommen ziet
Tot die gheele ziecte wort vul bedeghen
Door ghulsicheyt zijnder in d'Aerdtiche weghen
Veel ghestoruen, en commen in noodts bedwanghen
Maer die sober es, sal zyn leuen verlanghen.

[p. 139]

Huusratte ende Hoestere.

EEn Huus-ratte houdende weeldeghen staet
Van als verzaedt
Wt diueersch wild-braedt
Daer zou in haer bottelrie triumpheerde
Nochtans t'dier steden
Was niet te vreden
Couure dede haer verleedijnghe quaet
Vandt in hueren raedt
Datse om vernieuwen huer absenteerde
Huer ter Zeewaerts vermaecken zou ordonneerde
Daer commende, op t'vloemarckt speculeerde
Es een Hoestere gapende ghebleken
t'Was vetvisch docht de Ratte, derwaerts passeerde
End' heefter om grijpen t'hooft binnen ghesteken
d'Hoester voelde ghemoedt, dies rasch onbezweken
Sloot toe, de Ratte bleef inde bedwanghen
Duer huer lecker ghulzicheyt, wiert daer ghekeken
Zou die waende grijpen, was zelue ghevanghen,
Brasserie ouerdaedigch, doet veel ziecten ontfanghen.

Insghelijcx zijn sommighe de ghuene die

In vette cuckens subiect hem stellende daer
Om de minne van de brocken ende leckernie
Huer weluaerts partie
Daer zij in verwortelt blijuen menich Iaer
Als meschverckens openbaer
Hem zeluen metten tanden maekende voorwaer
Die dus om lecker morseelen ghedienstich slauen
t'Graf, daer zij duer schocken ende brocken claer
Steruende voor tijt, werden in begrauen,
Zulcke willen corruptie, met corruptie lauen.