De warachtighe fabulen der dieren

[p. 120]

[Den ouden Leeu en ander beesten]

Van ionex wilt Vrienden maken.

Zoo zuldijt in d'oude smaken.

Prouerb. 22. Deutero. 33.

DE ghene die heeft ghezaeyt boosheden
Sal quade dijnghen maeyen, hem zeluen ontrent
Ende met die roede van zijn gramme zeden
In tijden voorleden,
Ieghens die hem niet mesdeden
Daer mede sal hy werden volendt:
Ende ghelijck die daghen bekendt
Der ionckheyt bewesen,
Alsoo sal oock v ouderdom wesen.

[p. 121]

Den ouden Leeu en ander beesten.

DEn Leeu in zijn ionckheyt gheweest fiermoedigh
Grijpende bloedich
Heeft hem zeluen dus ghemaeckt veel vyanden
Zoo hy hadde ghedaen, t'keerd' hem ieghenspoedich
Want cranck, oudt zijnde, behaelde veel schanden
t'Peert slouch hem met de voeten in sticx de tanden
t'Wilde Vercken cam hem t'vel ontgorden
Den Stier doorstack hem met zyn hoorens banden
Hebben eyndelick t'samen den ouden Leeu vertorden
Met zulcker maete ghy meet, zult ghemeten worden.

¶ Den Leeu dus ligghende onder de voeten

Const hem zeluen niet helpen, noch t'lijden boeten
Als machteloos verwonnen, ter nedere lagh
En creech menighen slagh
Hy en hadder eenen Vriendt niet, die hem cam groeten
Niemant wasser die hem dede eenich verzoeten,
Zoo heeft hy hem moeten
Te vergheefs doen zijn deerlick beclagh
Hoe dat hy in menighen voorleden dagh
Veel beesten aenghedaen hadde gheweldt en pijne:
Ouer yemandt ghenadich, men hem zelden zagh,
Naer mijns wercx hebbe ick loon ten sijne
Pacientie es mijne:
Tes beter doodt dan vriendeloos t'zijne.

Zoo oock de mensche in zijn ionckheyt wandelt

t'Zij rechtlick onrechtlick hoet mach ghaen
Ende met zijnen euen naesten handelt,
Zoo salmen hem in d'oude ter noodt by staen
En loon doen ontfaen.