De warachtighe fabulen der dieren

[p. 118]

[Hert ende t'Schaep]

Belofte by bedwanghe gheschiet,

Es te houdene niet.

Psalm. 50. b. 14.

VVilt den alderhoochsten v beloften betalen
Want het es beter niet te belouen dan
Veel toe te zeggen, en als te falen
Of niet te houden datmen houden can.

Luce. 3. Eccle. 28.

NIemandt ouerlast doet
Gheweldt noch onrecht:
Noch weest gram ghemoet
Op Meester noch Knecht.

[p. 119]

Hert ende t'Schaep.

DEn Hert heeft t'Schaep voor den Wulf ghebrocht
Hem heesschende een viertaele taerwe graen
Dat t'Schaep hem die betalen zou, heeft verzocht
Ofte dat neen, hadde stranghelick ghedocht
Dat hy 'tSchaep zou met andere strafheyt aenghaen:
Maer t'Schaep wilder gheenssins niet toe verstaen
Hoe den Hert de vermaen
Als in hem ghehouden te zijne niet
Dus van rechts weghe zou den Hert niet ontfaen
Zijn zaecken waren maer een waen
Want onrechtelick was zijnen heesch gheschiet
Die rassechelick belooft, comt haest int verdriet.

¶ Den Hert viel clachtich, ende bleffer blij

De Wolf op een tsij
Heeft de zaecke (zoot scheen) ghemodereert
Om schuwen Proces, Dat t'Schaep zou hebben vrij
Zeker tijt om betalen, t'wiert gheaccepteert
En gheaccordeert:
t'Schaep beloofde wt vreesen, den tijt ghepasseert
Den Hert es commen om leuerijnghe stranghe
t'Schaep heeft hem dies te doene gherefuseert
End' als wel gheinstrueert
Ghezeyt, naer diueersche propoosten langhe,
Beloften houden gheen ste, ghedaen by bedwanghe.

Zoo vindtmen menich Cadet vul looser stoffen

Om zijn weeldich schoßen en broßen
Die d'onnoosel quellen ten onghelijcke
Waenende met huer dreeghementen verboffen
Maer zulck zonder hebben, wel voorby strijcke:
Onder een ghelapte rock, schuult dickwils practijcke.