De warachtighe fabulen der dieren

[p. 114]

[Hondt ende Dief]

In dienste altijt

Ghetrauwe zijt.

Apo. 2. Math. 25.

VVeest ghetrauwe totter doot, en ick sal v gheuen
De Croone des leuens, belooft God almachtich
Ende den onnutten Knecht, sal werden verdreuen
In die wterste duysterheyt duysternachtich
Dus blijft dienstbaer, en stantachtich.

1. Regum. 8. Eccle. 20.

Ghiften ende zenden, daerment laet ghedooghen,
Connen verblenden des Rechters ooghen.

[p. 115]

Hondt ende Dief.

EEn Huis-hondt zijnde zyn Meester ghetrauwe
In vruecht ende rauwe,
t'Huus bewarende nauwe:
Was van eenen Dief gheleydt listighe laeghen
Nachten en daeghen:
Om zyn bassen te sussene (dies ten beschauwe)
Wierp hem een gheheel broot naer zijnder maeghen
Maer den Hondt en hadder in gheen behaeghen
Midt dat hy was van zeer ghetrauwer aerdt
Hy hieldt niet op van bassen, zoo doende zijn claeghen:
En vanden Dief heeft zijns Meesters huus bewaerdet,
Goe ghetrauwe Dienaers, blijuen verre vermaert

¶ Den Dief es dies met schaemten vertrocken

Den Hondt const by niet locken
Met zyn bedrieghende ghiften, noch crijghen iet:
Hier by bewijsende, dat veel lecker brocken
Voor diese gheerne slocken
Den menighen brijnghen in zwaer verdriet
Zoo wie dat yemandt dan ghiften biedt
Om goeden dienst te keeren tot ontrauwichede:
Laet v niet verdoouen, wel voor v ziet,
Standtvastich blijft in v ghedienstichede
Door ghiften vercranckt zulcke rechtveerdichede.

En laet v niet bedrieghen, noch oock verfletsen

Om een bete broots zijt niet wanckeldaedich
Wie v gheeft ofte zendt:
Trauwe in dienst wilt niet ontletsen
Maer vast gheknocht houdt, vroom ghestadich,
Tot inden eyndt.