De warachtighe fabulen der dieren

[p. 108]

[Voghelare ende Partrijse]

Die andre waent verraeden,

Comt zelf in schaeden.

Eccle. 7.

OM quade dijnghen doen, wilt v niet dwijnghen
En die en sullen v niet beuanghen zaen
Scheedt vanden boosen, en de quade dijnghen
Zullen dan certeynelick van v ghaen
Hoort naer goet vermaen
Wilt gheen quae dijnghen zaeyen
In die ackervueren, der onrechtueerdichey staen,
Zoo en zult ghy die niet zeuenvoudich maeyen.

[p. 109]

Voghelare ende Partrijse.

EEn Vueghelaer had in zijn net ghevaet
Een Partrijse delicaet
Dies wistese gheen raedt
Want hoorde, hy wildese hebben ghedoodt
Oodtmoedich badt zou met een smeckende daedt
Hadthem ghedaen quaet
Om crijghen aflaet
En verlost mochte zyn wt die wterste noodt
Hem belouende, zoo zeker als in zijnen schoot
Mochte zou doe vanden lijfue ontsprijnghen
Dat zou met haer practijckelick exploot
Veel huer ghelijcke, in zijn net zou brijnghen:
Niet lichte salmen gheloouen smeeckende dijnghen.

¶ Neen sprack hy, neen dit sal v schaeden

Ghy zulter omme blijuen in onghenaeden
Smeeckende beloften, moghen v schoonen niet,
Ghy wilt verlost zyn, andre verraeden
End' uwer ghelijcke brijnghen in verdriet
Verraderlick bespiedt:
Die moet ghier t'lijf nv laten ziet
Gheroost an t'spit zijn tusschen twee branderen
Dese gratie sal v werden gheschiet
En wat belofte ghy biedt
Mijn voornemen sal ick gheenssins veranderen,
De quae moetmen punieren, in exempel van anderen.

Om uwen naesten verraden, om andre behaeghen

Tot lijden brijnghen, schande verdriet of schaede
Wilt v van sulcke dijnghen verdraeghen
Laet v niet vertweefelen, maer in al v daghen
Doet zoo ghy wildet datmen v daede.