De warachtighe fabulen der dieren

[p. 106]

[Vanden Esel, Kemel, Buffel, en Mule]

Aenueerdt den dienst alvoren.

Daer toe ghy zijt gheboren.

Psal. 127. Math. 10, Eccle. 33.

IN al v wercken v gheerne ghewillich maect
Ende neerstich waect
Van die aerbeyt uwer handen zult eten vrij
Een werckman es zyn cost weerdich, die wel smaect
De quaetwilleghe knecht die d'werck veracht,
Salmen te wercke zenden, dat hy werckende zy
En alzulcke, gheenssins ledich laten ghy
Want veel quaets end' aerch heeft ledicheyt gheleert
Door welcke oorzaecke, ende daer by
Menich es tot schanden ghecomen end' onteerdt.

[p. 107]

Vanden Esel, Kemel, Buffel, en Mule.

DEn Esel, Kemel, Buffel, ende Mule tsamen,
Claeghden dat zy waren tsmenschens slauen ghestelt
Door haeghel, door snee, door bosschen en bramen,
Ende gruwelick met slaeghen dicwils zijn ghequelt
Den Esel wilde niet meer wercken, al dedet gheldt
Maer wilde voort aen zelue op de Mule rijden,
Eens verlost zyn van t'stranghe gheweldt
Voor vele zuchtens, hebben eens weeldich verblijden:
Dit hoorende de Buffel, const hem niet vermijden,
Sprack doe totten Esel, Broeder ick waene:
Die ghestelt is om wercken, behoort niet leech te ghaene.

¶ Maer om wercken was d'Esel van gheenen advijse

Zoo opstinaetich wiert hy doen van manieren
De Buffel en de Kemel, dochten doen als de wijse
Om voorzien zyn van spijse:
Zouden wercken, end' hem naer haer natuere regieren
Kenden hemlieden slauen, bouen veel ander dieren
Daer af de Kemel was de meeste van al:
Want hy moeste in zyn aerbeydelick anthieren
Passeren (lastich gheladen) menich berch ende dal
De Buffel leedt somtijts oock groot ongheual
Wort (om leeden) gherijnghelt in zyn nuesegaten,
d'Esel by zijn propoost bleef, riep met een gheschal
Werckt die wille onder hulieder ghetal:
Ick en wille niet wercken, nochtans mijn eten niet laten.

Zoo zijnder oock menschen ruud en plomp int verstant

Becaem noch playsant, tot conste oft aerdicheden
Connen niet dan slauen, en oeffenen d'landt
Nochtans en steken zij daer an niet gheerne d'handt
Maer ghaen lieuer ledich, eten en drijncken met vreden.