De warachtighe fabulen der dieren

[p. 104]

[Beesten ende Voghelen strijt]

Elck blije vrij,

De zijne by.

Deutero. 23.

ALs ghy ieghens v Vyanden sult wt trecken
Ter oorlooghscher schaeren,
Van alle quade dijnghen, die bevlecken:
Zult v bewaren.

Eccle. 11. Math. 10. Eccle. 6.

Blijft niet inde wercken der zondaren
Maer hebt betrauwen in God bouen desen
En blijft in v plaetse int openbaren
Wie tot t'eynde volstandich blijft, sal zalich wesen:
Een afvallende mensche, end' onnut mespresen
Desen haestelicke met eenen val,
Zyn verderuenesse haest ouercommen sal.

[p. 105]

Beesten ende Voghelen strijt

DE Voghelen leuerden battaclie sterck
Ieghens alle de Beesten inder eerden perck
Elck hopende crijghen victorie openbaer
Zy zaghen vroom toe, met een snel ooghmerck
Elck vreesder insghelijcx de Oorloghen zwaer
De Vleermuus wasser oock ieghenwoordich daer
Maer bevreest van nederlaeghe, bogonst te beuen
Die vloodt zy wt den Legher der Voghelen voorwaer
Ende heeft haer metten Beesten ghaen ouergheuen:
Ghetrauwe soldaeten, by haer veendel oyt bleuen.

¶ Den Arendt met al zyn vloghelen snel en vlugghe

Vielen dapperlick an, hebben vroom ghestreden
De Beesten bleuen t'onder veel keerder te rugghe
Veltvluchtich op haer viervoetighe leden
Eyndelick, hebben om paeys-maecken ghebeden
Emmers een bestandt deden
Met conditien die niet en mochten lieghen
Dat de Vleermuus (die ouervlooch t'huerer onvreden)
Van doe voorts niet dan by nachte zou moghen vlieghen
Zy zijn punicy weerdich, die t'ghemeente bedrieghen.

De ghuene die mede helpen bezoeten

In weeldighen voorspoet ende gheluck
Tes reden dat die oock mede deelen moeten
En bieden handen voeten
Omme helpen wederstaen ancxst, vreese, en druck,
Die staende blijft, beclijft, en crijght wel den pluck
Voor t'zijnen loone:
Der victorieuse palme croone.