De warachtighe fabulen der dieren

[p. 100]

[Oude Catte ende Musen]

Die yet looslick te wercke leyt,

Doet meer dan door sterckheyt.

Prouerb. 2. Eccle. 4. ende 7.

DE cloucke hebben ouervloedighe tijden,
Maer een traech mensche sal ghebreck lijden.

Seneca.

VAn des menschens verstant vul onvreden
Es ledicheyt een confusie zwaer:
De poorte end' inghanck der droufheden,
En de moeder der armoe volght naer.

Hermes.

TGheluck helpt den ghenen die hem zeluen helpt
End' een traech mensche zyn weluaren stelpt.

[p. 101]

Oude Catte ende Musen.

EEn Catte gheworden traech ende oudt
Int claueren sprijnghen, niet meer so stout
Om Ratten en Musen te verschalcken snel
Dies heeft zou ghedocht tot haer behoudt
Haer voort aen ghaen t'houden ghemackelick wel
In een meil-kiste, ende niewers el
Met een voorstel
Looslistich fel
Ratten ende Musen te verlackene daer:
De welcke daer te vooren hadden gheen ghequel
Noch zulck quaet spel,
Wierden gheuanghen, d'een vooren, d'ander naer,
Alst noodt doet, zulck zoect nauwe list voorwaer.

Sghelijcx als yemandt de cracht faelgiert

Practijcke moet ghesocht sijn om leuen
Voorsienicheyt dient looselick dan gheantiert
Meer dan foortse, die dan achter es bleuen
Lisander heeft dies ten propooste ghescreuen
Datmen meer doen, en wtrechten sal
Met t'vel vanden loosen Vos subtijlick beseuen,
Dan met t'vel vanden Leeu, in eenich gheual
Behendicheyt is goet int aerdtsche dal
Aerdighe listicheyt, ter noodt dient gheacht:
Want hoe foortsich voornemen, bouen al,
Ghemeenlick zeghtmen, conste gaet voor cracht.