De warachtighe fabulen der dieren(1567)–Eduard de Dene– Auteursrechtvrij Vorige Volgende [pagina 98] [p. 98] [Dogghe ende t'Schaep] Valsch ghetughen hinderen, En t'recht verminderen. Leuiti. 19. GHy en zult niet lieghen Noch dijn naesten bedrieghen Noch onder schijn van rechte, hem onrecht doen Maer vonnesse gheuen Rechtueerdich leuen Met gheweldt niet verdrucken in gheen faeysoen. Prouerb. 25. ALs een schicht, een scherpe pijl, ende zweerdt, Es een mensche vol meyneedicheyt De ghene die (t'welck d'onnoosele deerdt) Ieghens zijnen naesten valsch ghetughe zeyt. [pagina 99] [p. 99] Dogghe ende t'Schaep EEn hongherighe Dogghe bloetghierich ghebeeent Van andere gheteent Heeft t'onnoosel Schaep voor t'Recht ghehadt Ter causen van broodt (zoo hy bies) hem gheleent Maer t'Schaep was gheheel ontkennende dat Oock gheenssins hem schuldich te zijne wat Den Hondt doe vergramt, dat t'Schaep niet wilde bughen Sinisterlick docht hyt t'onderworpene plat Maecken moe en mat, Ende wt nijdicheyt zijn bloet afzughen t'Zijn wanckelbaer processen, die staen op ghetughen. ¶ Drie ghetughen de Hondt heeft wtghezocht En zoot wel ghebuert, ghehuert of ghecocht Den Wolf, den Ghier, en de Wuwe mede, Dese hebben met valscheyt voortghebrocht En loostlistich voordocht Dat t'Schaep t'broot schuldich was, daer ter stede d'Hondt wilde dat tSchaep rasch betalijnghe dede Maer midts datt hadde waer mede betalen niet Es vanden Hondt verschuert, zonder ghenadichede Alleene zonder hulpe, vandt hem t'Schaep int verdriet d'Onnoosele men meest cleene bystant biedt. t'Gheschiedt: Zoo is te duchten, dat d'onnoosel met allen Worden ouervallen End' in haer clachtich claghen, werden niet ghehoort Wt-ghemaecte ghetughen, t'goet recht versmallen Ontcaetsende d'onnosel dat, metten gheld-ballen Es de man ghewesen, t'gheijsde gaet voort De balanche wijct met een veselijnghe woordt. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij